በሃገር ቤት የሚታተመው እንቁ መጽሔት የቴዲ አፍሮን ቃለምልልስ በተሳሳተ ርዕስ ማውጣቱን ተከትሎ በርካታ ውዝግቦች ተከስተው ቆይተዋል። መጽሔቱ እርማት የሰጠ ቢሆንም አንዳንድ ወገኖች ግን የተሳሳተውን የመጽሔት የሽፋን ገጽ በማየት መነጋገሪያ አድርገውት ቆይተዋል። ቴዲ በዚህ ጉዳይ ላይ ለአድናቂዎቹ በፌስቡክ ገጹ በአማርኛ እና በ እንግሊዘኛ ቋንቋ ምላሽ ሰጥቷል። እንደሚከተለው ይነበባል።

ለሙዚቃ አፍቃሪዎቼ በሙሉ

ከጥቂት ሳምንት በፊት የዳግማዊ ሚኒሊክን መቶኛ አመት የሞት መታሰቢያ ምክንያት በማድረግ በእንቁ መጵሔት ተጋብዤ ቃለ ምልልስ አድርጌአለሁኝ። ይሀዉ ዉይይታችን በ “አመጣጡን ያየ አካሄዱን ያዉቃል “ እርዕስት ስር ለህዝብ እንደቀረበ አዉቃለሁ። ከዚህ ዉጪ እኔ በማላዉቀዉ ሁኔታ መፅሔቱ በሰራዉ ስህተት ፎቶዬን በሌላ አነጋገር አጅቦ ያወጣዉ ከኔ እምነትም ሆን ጉዞ ጋር የሚራመድ ጉዳይ አይደለም። ይህንኑ ለማረጋገጥ “አመጣጡን ያየ አካሄዱን ያዉቃል” በሚል ርዕስ ስር በወጣዉ መፅሔት መልክቶቼን በማየት ማረጋገጥ ይቻላል። ያም ሆኖ መፅሔቱ በሰራዉ ስህተት እርምት አድርጎ ይቅርታም ጠይቆናል። ጉዞዬ የፍቅር የአንድነት እና የይቅር ባይነት ነዉና ይህንንም ጉዳይ በዚሁ ስሜት ውስጥ እናስተናግደዋለን።

ፍቅር ያሽንፋል!

ቴዎድሮስ ካሳሁን

To lovers of my music;

A few weeks ago I gave an interview to Enqu magazine in relation to the memorial marking the 100th year since the death of Menelik II.

I know that this interview was presented to the public under the title “Ametatun yaye akahedun yawkal.” However, under circumstances unbeknownst to me and due to the error of the magazine, my photo was printed along side a different quote which is not in line with my belief or journey.

As proof of this, one can refer to my message contained in the article titled “Ametatun yaye akahedun yawkal,” in the magazine article. The magazine has issued a correction and apologized to us for its error.

As my journey is one of love, unity and closeness/togetherness, we will handle this issue with the same emotion/ principle/sentiment.

Love will triumph”

Tewodros Kassahun.

ዝነኛው የሳክስፎን ሙዚቃ ተጫዋች ቴዲ ምትኩ የቀብር ስነሥርዓት ቅዳሜ እለት በሜሪላንድ መፈጸሙ ይታወሳል። ስለዚህ ታላቅ ሰው ታማኝ በየነ ያቀረበውን የቪድዮ ትንታኔ አካፍለናችኋል።

(ዘ-ሐበሻ) በኢትዮጵያ ቴሌቪዥን ይተላለፍ በነበረው ገመና ድራማ የዶ/ር ምስክርን ገፀ ባህርይ ወክሎ የተወነውና በተለያዩ ፊልሞች ላይ የተወነው አርቲስት ዳንኤል ተገኝ መታሰሩን የዘሐበሻ ዘጋቢዎች ከአዲስ አበባ ገለጹ። አርቲስቱ የታሰረው በካራማራ ፖሊስ ጣቢያ ሲሆን ዛሬ ፍ/ቤት ይቀርባል፡፡ የጊዜ ቀጠሮ ተጠይቆበት ለቀጣዮቹ 14 ቀናት እስር ቤት እንደሚቆይም ይጠበቃል፡፡
የዘ-ሐበሻ ዘጋቢዎች የአርቲስቱን የክስ መዝገብ በመጥቀስ እንደዘገቡት ዳንኤል የታሰረበት ምክንያት አንዲት ባለትዳር ሴትን ከሌላ ወንድ ጋር ስትሳሳሚ ፎቶ አንስቼሻለሁ ይህንንም ፎቶ በፌስ ቡክ አለቀዋለሁ ብሎ በስልክና በአካል በማስፈራራቱ ነው፡፡ አርቲስቱ ከዚህችው ወ/ሮ ፊልም እሰራለሁ ብሎ 500 ሺ ብር እንደተቀበለና በማጭበርበር ክስ እንደቀረበበት በተለያዩ ሚዲያዎች በዘገቡ ይታወቃል፡፡( ስለዚሁ ጉዳይ ባለፈው ቅዳሜ ለንባብ የበቃው ቁም ነገር መፅሄት ሁለቱንም ወገኖች ማነጋገሩ ይታወቃል) ሰለጉዳዩ ተከታትለን እናቀርባለን።

(ዘ-ሐበሻ) አንዲት ባለትዳር ሴትን ከሌላ ወንድ ጋር ስትሳሳሚ ፎቶ አንስቼሻለሁ ይህንንም ፎቶ በፌስ ቡክ አለቀዋለሁ ብሎ በስልክና በአካል አስፈራርቷል በሚል ክስ ተመስርቶበት የታሰረው አርቲስት ዳንኤል ተገኝ ፍርድ ቤት ቀርቦ በዋስ መለቀቁን የዘ-ሐበሻ ዘጋቢዎች ከአዲስ አበባ ገለጹ።

ከዚህ በፊት በነበረው የዜና እወጃችን አርቲስት ዳንኤል ተገኝ መታሰሩን የዘገብን ሲሆን ዜናውን ተከታትለን እንደምንዘግብ ቃል በገባነው መሠረት ዛሬ የዘ-ሐበሻ ዘጋቢዎች ጉዳዩን በቅርበት ሲከታትሉ ነበር የዋሉት። አርቲስቱ “ወንድ ጋር ስትሳሳሚ ፎቶ አንስቼሻለሁ ይህንንም ፎቶ በፌስ ቡክ አለቀዋለሁ ብሎ በስልክና በአካል አስፈራርቷል” በሚል ከቀረበበት ክስ በተጨማሪ ከዚህችው ወ/ሮ ፊልም እሰራለሁ ብሎ 500 ሺ ብር እንደተቀበለና በማጭበርበር ክስ ቀርቦበት እንደነበር ይታወሳል።

ዘጋቢዎቻችን አርቲስት ዳንኤል ክስ በዋስ ስለመፈታቱ እንጂ ለፍርድ ቤቱ ስንት እንዳስያዘ የጠቀሱት የለም። ሆኖም ግን አርቲስቱ ሌላ ቀጠሮ ተሰጥቶት ዋስትና አስይዞ ተፈቷል።

“ስለ ፍቅር ሲባል ስለ ጸብ ካወራን ተሣስተናል”
- አርቲስት ቴዎድሮስ ካሣሁን

ከአስተባባሪው ኮሚቴ፦

በዓለም ዋንጫ እንዲገኝ ኢትዮጵያን እና አፍሪካን ወክሎ ለተመረጠው ኢትዮጵያዊ አርቲስት ድጋፋችንን እንግለጽለት የሚል ነው። መልእክቱ ቴዲ አፍሮን ለመደገፍ ብቻ እንደተፃፈ አትመልከቱት። ከዚህ በላይ ሰፋ አድርጋችሁ ለአገራችንን ውክልና ድጋፍ ለመስጠት እንደተፃፈ አስቡት። ተመርጦ የነበረው አርቲስት አሊ ቢራም ቢሆን አለያም አስፋው ጀብጀብ፤ መልእክታችን የሚሆነው ይኸው ነበር። አርቲስቱ ማንም ይሁን ማን፣ አገራችን ያገኘችው ይህ ወርቃማ ዕድል በስኬት እንዲጠናቀቅ እጅ ለእጅ እንያያዝ ነው እያልን ያለነው። በቃ። ከዚህ ውጪ ምንም ትርጉም የለውም። ዋነኛ የቆምንለት ዓላማ ፍቅርንና ወንድማማችነትን ማወጅ ነው።

ለቴዲ ድጋፍዎን ለመግለጽ የሚከተለውን የፌስቡክ ገጽ ላይክ ያድርጉ https://www.facebook.com/pages/Teddy-Afro-to-represent-Africa-for-2014-FIFA-Coca-Cola-world-cup/217835185067743

የቴዲ የብራዚል ጉዞ – ድጋፍዎን በፌስ ቡክ ይግለጹ:
ይህንን ፔጅ ይውደዱ >> Like the page Teddy Afro to represent Africa for 2014 FIFA world cup

(ዘ-ሐበሻ) በተለያዩ ትያትሮች እና ፊልሞች ላይ በመተወን የሚታወቀውና ባለፈው ረቡዕ ከዚህ ዓለም በሞት የተለየው አርቲስት ፈለቀ ጣሴ የተወለደው በ1962 ዓ.ም ነበር። ለአጭር ጊዜ ብቻ የታመመው ይኸው ተወዳጅ አርቲስት ሥርዓተ ቀብሩ በደብረሊባኖስ ገዳም ተፈጽሟል።

በአዲስ ከተማ ትምህርት ቤት ትያትር እንደጀመረ የሚነገርለት አርቲስት ፈለቀ በአርቲስት ተስፋዬ አበበ ከሰለጠኑ ተዋንያኖች መካከል አንዱ ለመሆንም በቅቷል። ከዛም በሃገር ፍቅር ትያትር

- የጣር ሳቅ፣
- የቀለጠው መንደር፣
- ጥምዝ፣
- የወፍ ጎጆ፣
- ባልቻ አባነፍሶ፥
በአዲስ አበባ ትያትርና ባህል አዳራሽ፦
- ቀስተ ደመና፣
- የክፉ ቀን ደራሽ፣ የደም ቀለበት፣
- ማዶ ለማዶ፣ ፍለጋ፣
- ጣይቱ፣
- ምርጫው፣
- ሶስና
- የታፈኑ ጩኸቶች በተሰኙና በሌሎችም ትያትሮች ላይ ተውኗል።

ባለፈው ረቡዕ በተወለደ በ44 ዓመቱ ከዚህ ዓለም በሞት የተለየው አርቲስት ፈለቀ ጣሴ፤ከትላንት በስቲያ በደብረሊባኖስ ገዳም፣ ወዳጅ ዘመዶቹ በተገኙበት የቀብር ሥነሥርዓቱ ተፈፅሟል፡፡

ይኸው ተወዳጅ አርቲስት በፊልም ደረጃ “ሰርፕራይዝ” እና “ጥቁር ነጥብ” በተሰኙ ፊልሞችም ላይ መስራቱ ይታወቃል፡፡

ነብስ ይማር።

ባለፈው ቅዳሜ በቦስተን “ድንቅ ናት ኢትዮጵያ” የተሰኘ ትልቅ የሙዚቃ ኮንሰርት ተደርጎ ነበር። በዚህ ኮንሰርት ላይ የተለያዩ ኢትዮጵያውያን ድምፃውያን ሥራዎቻቸውን አቅርበዋል። ስንታየሁ ሂቦንጎ፣ ሃፍቶም ገብረሚካኤል፣ ጃምቦ ጆቴ፣ ፋሲል ደመወዝ፣ ትርሃስ ኮበሌ፣ ሃጫሉ ሁንዴሳ፣ ንጉሱ ታምራት፣ አቡሽ ዘለቀ፣ አብነት ግርማ (ትንሹ ጥላሁን)ና ደራሲና ገጣሚ በ እውቀቱ ስዩም በዚህ ድንቅ ናት ኢትዮጵያ ኮንሰርት ላይ ተሳትፈዋል። በዚህ ኮንሰርት ላይ ከቀረቡ ዘፈኖች መካከል ምሽቱን ያደመቀው የሃጫሉ ሁንዴሳን ዘፈን ከመድረክ ላይ ተቀርጾ ደርሶናል – ይካፈሉት። እውነትም ድንቅ ናት ኢትዮጵያ!

አርቲስት ቴዎድሮስ ካሳሁን ከሰሞኑ በአወዛጋቢነት በቆዩት ጉዳዮች ዙሪያ ለአዲስ አድማስ ጋዜጣ ምላሽ ሰጥጧል። እንደወረደ እነሆ፤-

ፈጣሪ በየትውልዱ የራሱን ድምጽ ያወጣል
ፍቅር ያሸንፋል– የኔ ሳይሆን የትውልድ ድምጽ ነው
እዳ አለ የምንል ከሆነም፤ እዳ የሚከፈለውና የሚሸፈነው በፍቅር ብቻ ነው

“ከታሪክ ከወረስነው ቂም ይልቅ የምናወርሰው ፍቅር ይበልጣል”

የፍቅር ጉዞ ከሚለው ሃሳብ እንጀምር፡፡

መነሻው ምንድነው? “አቦጊዳ ብዬ፣ ፊደል “ሀ”ን ቆጥሬ፤

የፍቅርን ትርጉም ለልቤ አስተምሬ፣

ይዤሽ በአኮፋዳ እንደቆሎ ተማሪ፣

አቦጊዳ ልበል የፍቅር ጀማሪ…”

እንዲህ ነው የኔ የዘፈን ህይወት የሚጀምረው። አሁን የፍቅር ጉዞ ላይ ደርሷል፡፡ ሁላችንም፣ በተለያዩ የታሪክ አጋጣሚዎች ውስጥ እናልፋለን። ብዙ ቅሬታና ብዙ ደስታ፣ ብዙ ትክክል የሆኑ ነገሮችና ብዙ ትክክል ያልሆኑ ነገሮች አሉበት – ያለፍንበት ታሪክ፡፡ ትልቁ ነጥብ፣ ካለፍንበት ታሪክ ተነስተን ለሚቀጥለው ጊዜ ምን እናድርግ የሚለው ነው፡፡ ያዘንበትን ነገር በይቅርታ ሰርዘን፣ የወደድነውን ነገር ደግሞ አሳድገን ለመጓዝ፣ ትልቁ መድሃኒት ፍቅር ነው፡፡ ይቅር ተባብሎ የቀድሞ ስህተቶችን ለማስተካከልና በህብረት ተጠራርቶ የቀድሞ ትክክለኛ ነገሮችን ለማሳደግ፣ ፍቅር ያስፈልጋል፡፡ አቡጊዳ ብለን ነው ፍቅርን የምንጀምረው፡፡ “ዳህላክ” ላይም፣ ለልጆቻችን ቂምን አናውርስ ብለናል፡፡ “ካስተማርሽው ፍቅርን በጊዜ፣ አይሻለሁ ወይ ባሱ ጊዜ…” ኢትዮጵያና ኤርትራ ተራርቀው የተፈጠረው ግጭት የሩቅ ጊዜ ታሪክ አይደለም። የብዙዎችን ህይወት በቀጠፈው ግጭት፣ ብዙ የተበተነ ቤተሰብ፣ የደማ ስሜት አለ፡፡ ይሄ ቁስል ዘላለም እንደመረቀዘ መቀጠል አለበት? መዳን መፈወስ የለብንም? ይቅር መባባልን ነው በ“ያስተሰርያል” የዘፈንነው፡፡ ለምንወልዳቸው ልጆች፤ ለምንፈጥራቸው አዲስ ትውልዶች የምናወርሰው ቂምን ከሆነ፣ ያለፈው መቁሰል ሳይበቃ ለወደፊትም ሌላ አደጋ እንዲፈጠር እየተባበርን ነው ማለት ነው፡፡ የሚሻለው መፍትሔ፣ እኛ የወረስነው አለመግባባት ካለ፣ በቂም ሰበብ የተቋሰልነው ነገር ካለ፣ የአዲሱን ትውልድ ህይወት እንዳያውክ፣ እኛ ጋ መቆም አለበት ብዬ አምናለሁ፡፡

የዘመናችን ፈተናዎች ሳያንሱ፣ የቅርብ ጊዜ የቂም ታሪክንም እየተሸከመን፣ ከዚያም አልፎ የሩቅ ጊዜ የቅሬታ ታሪኩንም እየቆሰቆስን ቂምን የምናወርስ ከሆነ፣ ለማናችንም ሕይወት የማይጠቅም፣ የልጆቻችንንም ተስፋ የሚያጨልም አደጋ እየፈጠርን እናልፋለን፡፡ ቂምን መሻር፣ ቁስልን መፈወስ፤ ከዚያም አልፎ ለሁላችንም የሚበጅና የተስፋ ብርሃንን የሚያደምቅ ነገር መስራት የምንችለው በፍቅር ነው፡፡ ከ “አቡጊዳ” እስከ “ያስተሰርያል”፣ “ዳህላክ”፣ ቀላል ይሆናል”…እና ሌሎች ዘፈኖች ይህንን መልዕክት ያስተላልፋሉ፡፡ ግን ልዩ አዋቂ ስለሆንኩ ወይም ልዩ ሃይል ስላለኝ አይደለም፡፡ በፈጣሪ ሃይል ነው። ፈጣሪ በየትውልዱ የራሱን ድምጽ ያወጣል። የትውልዱን ድምጽ በኔ አድርጐ ማውጣቱን አምናለሁ፡፡ አሁን፣ ቅን እና ጥሩ ትውልድ አለ፡፡ የዚህ ቅን ትውልድ ድምጽ የፍቅር ድምጽ ነው። ግራ የሚያጋቡ፣ የሚያስጨንቁና የተተበተቡ ችግሮች ሁሉ በፍቅር ይፈታሉ፡፡ ከቂም፣ ከቁስል በፍቅር እንዳን፣ ፍቅር ያሸንፋል የሚለው መልዕክት የኔ ሳይሆን የትውልድ ድምጽ ነው፡፡ ይህ ቅን ትውልድ ተቀራርቦ፣ ተሰባስቦ አንድ ላይ የፍቅር ድምፁን የሚያስተጋባበት እንዲሆን ታስቦ የተዘጋጀ ነው የፍቅር ጉዞ፡፡

በፖለቲካም ሆነ በሌላ ምክንያት፣ በተለያየ ችግርና አለመግባባት በአገራችን ለተከሰተው ቂምና ቁርሾም፣ እዚህ አገር ቤትም ሆነ በየአገሩ ተበታትነው የሚገኙ ወገኖቻችን፣ ቢያንስ ለልጆቻቸው ሲሉ ይቅር መባባልን እንዲቀበሉ ለመጋበዝ፤ የአዲሱ ትውልድ ስሜትም ይሄ እንደሆነ የሚገልፁ ዝግጅቶችን ለማቅረብ ነበር ያቀድነው፡፡ ዝግጅቱን በተለያዩ የኢትዮጵያ ከተሞች በስፋት ለማዳረስ ነው፤ በሄኒከን ከሚተዳደረው በደሌ ቢራ ጋር ተነጋግረን ውል የተፈራረምነው፡፡ በተፈራረምንበት እለት እንደተገለፀውም፤ የቋንቋና የብሔር ስብጥር ውስጥ ህብረትና አንድነታችንን የሚያጠናክር፣ ቂም እንዳንወርስና መልካም መንፈስን ለመጋራት አንድ ላይ የሚጮህ የፍቅር አላማ ያለው ዝግጅት ነው፡፡ ግን፣ የኢትዮጵያ ታሪክም ሆነ የኢትዮጵያውያን ሕይወት አንተ እንደምትለው፣ በፍቅርና ሰላም ብቻ የተሞላ ሳይሆን፣ በቂምና በግጭትም የተበረዘ ነው፡፡

አይደለም? ምን ጥርጥር አለው! ያሉና የነበሩ ነገሮች ናቸው፡፡ የህይወት እና የደስታ ውድነት ትርጉም የሚኖረው ከሞትና ከሀዘን ጋር ነው፡፡ የፍቅር ውበት የሚጐላው፣ ከጥላቻ ጋር ሲነፃፀር ነው። ነገር ግን ያሳዘኑን ነገሮች ላይ ብቻ ስናተኩር፣ አዲሱንና የወደፊቱን ትውልድ ያውካል፡፡ እዳ አለ የምንል ከሆነም፤ እዳ የሚከፈለውና የሚሸፈነው በፍቅር ብቻ ነው፡፡ ፍቅር መድሃኒት ነው፡፡ የነገር ሁሉ መጀመሪያና መጨረሻ ነው፡፡ ሁላችንም ህፃናትን ማቀፍና መሳም የምንወደው ለምንድነው? ገና ሲወለዱ፣ ገና ከመነሻው ሲፈጠሩ ፍፁም ፍቅር ስለሆኑ ነው፡፡ ያ የፍቅር ሃይል ነው የሚስበን፡፡ ህፃኑም እናቱ ጉያ ውስጥ የሚገባው በፍቅር ሃይል ነው፡፡ እንኳን ሰውን የመሰለ ክቡር ፍጥረት ይቅርና አውሬ የምንላቸው እንስሳት ውስጥም የምናየው የተፈጥሮ ሃይል ነው፤ ፍቅር፡፡ ነገር ግን በኑሮ ውስጥ በብዙ ውጣ ውረድ፣ ብዙ ቅሬታዎችና እንከኖች ስለሚያጋጥሙን ፍቅራችንን ሊበርዙብን ወይም ውስጣችንን መርዘው የውስጥ ህመም ሊሆኑብን ይችላሉ፡፡ ባዘንበትና በተቀየምንበት ነገር ላይ ቆመን ተውጠን ስንቀር በሽታ ይሆኑብናል፡፡ ለቅያሜ እልባት እየሰጠንና እየሰረዝን ካልሄድን፣ ይባስ ብለን ለልጅ ልጅ እያወረስን ከቀጠልን፣ በማህበረሰብ ደረጃ እንደዝገት ውስጣችንን እየበላ ይጨርሰናል ወይም እንደተዳፈነ እሳት በሆነ አቅጣጫ ተግለብልቦ ያቃጥለናል፡፡

እና ምን ይሻለናል ብለን ስናስብ፣ በቀድሞ ዘመን ወይም ባለፍንበት ጊዜ የተፈፀሙ መልካም ነገሮችን ወይም ስህተቶችን እንዳልነበሩ ማድረግ አንችልም። ወደኋላ ተመልሰን በህይወት የሌሉ ሰዎችን መሸለም ወይም እዳ ማስከፈል አንችልም፡፡ እነሱ በዘመናቸው አልፈዋል፡፡ ነገሩ ያለው የዛሬ ነዋሪዎች ላይ ነው፡፡ በቀድሞ ሰዎች ታሪክ የምንደሰትበትና የምናዝንበት፣ ትክክል የሆኑና የተሳሳቱ ስራዎች፣ የወደድነውና የተቀየምንበት ነገር ይኖራል፡፡ ቀጥለው የመጡ ትውልዶች የትኛውን ስሜት መያዝ፣ የትኛውን ስሜት ማውረስ አለባቸው? እኛስ የትኛውን ወርሰን የትኛውን ማሳደግ አለብን? ቅሬታና ቂምን ይዘው ያወርሱናል ወይስ ፍቅርንና መዋደድን? ቅያሜና ቂም ብንወርስ ምን ይበጀናል? ወደ ኋላ ተመልሰን እዳ ማስከፈል አንችል? ህይወት የሚቀጥለው፣ ካለው ነገር ላይ በመነሳት ነው፡፡ ስህተቶችን ትተን፣ ትክክል የሆኑትን ይዘን፣ ያን እያሳደግን ነው መቀጠል ያለብን፡፡ ታላላቆቻችን በተለያዩ አለመግባባቶች ውስጥ ያልፋሉ፡፡ አለመግባባትና ቅሬታ ባይፈጠር መልካም ነበር፡፡ ነገር ግን ቢያንስ ቢያንስ፣ የታላላቆችን አለመግባባት ወደ አዲሱ ትውልድ እንዳይሻገርና መጪውን ጉዞ እንዳያውክብን፣ ታላላቆቻችን ስለ አዲሱ ትውልድና ስለመጪው ትውልድ መጨነቅ ያስፈልጋቸዋል ብዬ አስባለሁ። ፍቅር ያሸንፋል የሚለው የታናናሾች የአዲሱ ትውልድ ድምጽም ጐልቶ መሰማት እንዳለበት አምናለሁ፡፡ የፍቅር ጉዞ የዚህ የአዲሱ ትውልድ መንፈስ ነው፡፡ የፍቅር ጉዞ ዝግጅት ከበደሌ ቢራ ጋር ተፈራርመህ በሳምንቱ ነው ውዝግብ የተፈጠረው። እንዴት ነበር የሰማኸው? ከጊዜ በኋላ ነው የሰማሁት፡፡

አንደኛ በድሬዳዋ አንድ ተብሎ የሚጀመረው ጉዞ፣ ትልቅ የፍቅር መልዕክት የያዘ ስለሆነ፣ ያልተበታተነ ትኩረት ይፈለጋል፡፡ ከዚህ ውጭ ባለው ጊዜ ደግሞ፣ በሚቀጥለው መስከረም ወይም ብዙ ሳይቆይ አዲስ አልበም ለማድረስ የጀመርኩት ስራ አለ፡፡ ሁለቱም ቀናተኛ ስራዎች ናቸው፡፡ አእምሮህ ሌላ ነገር እንዲያስተናግድ አይፈቅዱልህም፡፡ በዚህ ምክንያት፣ ባልደረቦቼ በኢንተርኔት በተፈጠረው ውዝግብ ዙሪያ ሊያናግሩኝ ሲሞክሩ ስራ ላይ ሆኜ ብዙም ፈቃደኛ አልነበርኩም፡፡ ሲደጋገም ግን ሰማሁ፡፡ ማኔጀሬ (ዘካሪያስ) ተጨንቆ ነው የነገረኝ። ከሥራ አስኪያጅ አንፃር ሆነህ ስታየው መጨነቁ አይገርምም፡፡ ግን ተረጋግተን ነው የተነጋገርነው፡፡ አልተረበሻችሁም? ነገሩን አቅልለን አላየነውም፡፡ የፍቅር ጉዞ ትልቅ ዝግጅት ነው፡፡ ነገር ግን፣ በብዙ ወጣ ገባ መንገድ ከማለፍ እና ብዙ ውጣ ውረድ ከማየት የተነሳ፣ ችግሮችን ማስተናገድ ትለማመዳለህ፡፡ ከሁሉም በላይ ደግሞ የፍቅር መልእክት፣ በቴዎድሮስ ካሳሁን የተፈጠረ ሃሳብ አይደለም፡፡ የነበረ ያለና የሚኖር የእግዚአብሔር ሃሳብ ነው፡፡ ያንተ ድርሻ ያ ሃሳብ ሲሰጥህ መቀበል ነው እንጂ፤ አንተ ከምትጨነቀው በላይ ከምንም አስበልጦ፣ ፈጣሪ ስለ አላማውና ስለሃሳቡ፣ ስለ እኛ እና ስለትውልዱ ስለሚጨነቅ፣ ብዙ አልተሸበርንም፡፡ ሁሉንም ነገር ለበጐ ያደርገዋል ብዬ አምናለሁ፡፡

“ጥቁር ሰው” በሚለው ዘፈንህ በአድዋ ጦርነት ዙሪያ ምኒልክንና ሌሎች የታሪክ ሰዎችን በማንሳት ዘፍነሃል፡፡ የምኒልክ ታሪክ ላይ ያለህን አስተሳሰብ በቅርቡ ቃለ ምልልስ አድርገህ በመጽሔት ታትሟል፡፡ ከዚህ ቃለ ምልልስ ጋር ተያይዞ ነው የምኒልክ ጦርነት ቅዱስ ነው የሚል አወዛጋቢው አባባል የተሰራጨው፡፡ በመጽሔት ታትሞ በወጣው ቃለምልልስ ላይ፣ እንደዚያ አይነት አባባል የለም፡፡ “አካሄዱን ያየ አመጣጡን ያውቃል” በሚል ርዕስ በእንቁ መጽሔት ታትሞ የወጣውን ቃለምልልስ ማየት ይቻላል፡፡ በምኒልክ መቶኛ የሙት ዓመት መነሻነት የተደረገ ቃለምልልስ ነው፡፡ በዚህ ቃለምልልስ ውስጥ ማንንም የሚያስቀይም አባባል የለበትም፡፡ ነገር ግን በኢንተርኔት ሲሰራጭ የኔ ያልሆነ አባባል ታክሎበት የተከፉ ሰዎች እንዳሉ ስሰማ፣ የተሳሳተውን መረጃ ለማስተካከል ምላሽ ሰጥተናል፡፡ እኔ ብቻ ሳልሆን፣ የመጽሔቱ አዘጋጅም አወዛጋቢው አባባል እኔ የተናገርኩት እንዳልሆነ፣ በመጽሔቱ ህትመት ውስጥም እንዳልነበረ አስረድቷል፡፡ ነገር ግን ውዝግቡ በዚህ አልተቋጨም፡፡ ለምን የፍቅር ጉዞን የሚያስተጓጉል ነገር ተፈጠረ አልልም፡፡ እዚህ ምድር ከተገለጡትም ሆነ ካልተገለጡት ሃይሎች ሁሉ የሚልቀው ፍቅር ነው፡፡ ክብደቱም የዚያኑ ያህል ነው፡፡

ስለዚህ የፍቅር ጉዞ ብለህ ስትነሳ፣ ያለ እክል እና ያለ ችግር ትደርሳለህ ማለት አይደለም፡፡ እንኳን ትልቁና ከባዱ ጉዞ ላይ ይቅርና፣ እንደ ቀላል የምናያቸው ጉዞዎች ላይም፣ ወደ ናዝሬት ወይም ወደ አዋሳ ለመሄድ ስትነሳ እንኳ፣ በመኪኖች መጨናነቅ ጉዞህ ሊጓተት ይችላል። ጐማ ቢተነፍስ ወይም ሞተር ቢግል፣ ጐማ ለመቀየርና የራዲያተር ውሃ ለመለወጥ መቆምህ አይቀርም፡፡ ከሁሉም የከበደው የፍቅር ጉዞ ላይማ፣ ለምን ፈተና ይፈጠራል ማለት አይቻልም። ከምንም በላይ ይቅር መባባልን የሚያበዛ የእርቅ መንፈስን ይዘህ ስትጓዝ፣ እንዲያውም ከተቻለ ታላላቆችህም እንዲግባቡልህና መግባባትን እንዲያወርሱ ስትጮህ፣ በዚህ ምክንያት ካንተ ጋር የማይግባባ ነገር ሲፈጠር፣ ነገሩን ንቀህ የምታልፈው አይሆንም፡፡ ምንም እንኳ፣ በተሳሳተ መረጃ ምክንያት የተፈጠረ ቅሬታ ቢሆንም፣ አንተም በተራህ የቅሬታ ባለቤት መሆን የለብህም፡፡ ፍቅር ሁሉንም ያቅፋል፡፡ በተሳሳተ መረጃ የተነሳ ያልወደደህንም ሰው ማቀፍ አለበት። የቃለምልልሱ ሁለተኛ ክፍል በሚቀጥለው ሳምንት ይጠብቁን፡፡

(ፋርማሲስት፣ ተዋናይ፣ የማስታወቂያ ባለሙያና የፊልም ፕሮዲዩሰር)

ገመና በተሰኘውና ብዙዎች በፍቅር ይከታተሉት በነበረው የቴሌቪዥን ድራማ ላይ ድንቅ የትወና ችሎታውን ያዩ በርካቶች አጨብጭበው መስክረውለታል፡፡ የቤታቸውን ሠራተኛ አፍቅሮ የሚንከራተተውን ሚኪ የተባለውን ገፀ ባህሪይ መስሎ ሳይሆን ሆኖ መተወኑ በወቅቱ ካይን ያውጣው አሰኝቶት ነበር፡፡ በዚህ ድራማ ላይ ባሳየው ምርጥ የትወና ብቃት ድራማውንና እሱን ነጥሎ ማየት እስከሚያቅት ድረስ የበርካታ ተመልካቾችን ስሜት ለመግዛት የቻለ ወጣት ተወናይ ነው፡፡ በድራማው መጠናቀቂያ ወቅት በተመልካች ምርጫ አሸናፊ የሆኑ ተዋንያንን ለመሸለም በተዘጋጀው የድራማው ምርጥ የወንድ ተዋናይ ተብሎ ለሽልማት በቅቷል፡፡ ከትወና ሙያ ጋር ከተዋወቀበት 522 በተሰኘው ፊልም በኋላም ለአባቷ ጃንደረባውና ትዝታህ የተባሉትን ፊልሞች በዋና እና በረዳት ተዋንያንነት ሰርቶባቸዋል፡፡ ሰሞኑን ደግሞ ‹‹ፍቅሬን ያያችሁ›› የተባለ አዲስ የፍቅር ፊልም ፕሮዲዩስ አድርጎ ይዞልን ብቅ ብሏል፡፡ በዚህ ፊልም ላይ ከፕሮዲዩሰርነቱ ሌላ በዋና ገፀ ባህሪይነት ተውኖበት ድንቅ የትወና ችሎታውን አሳይቶናል፡፡ ወጣቱን ፋርማሲስት፣ ተዋናይ፣ የማስታወቂያ ባለሙያና የፊልም ፕሮዲዩሰር መሐመድ ሚፍታህን አግኝተን ጥቂት አውግተናል፡፡

የመጀመሪያ ፊልምህን የሰራኸው በአጋጣሚ ነው ሲባል ሰምቻለሁ፡፡ እስቲ ስለዛ አጋጣሚ አጫውተኝ?

ፊልም መስራት ከልጅነቴ ጀምሮ በጣም እመኘው የነበረ ጉዳይ ነው፡፡ እናም ፊልም ይሰራሉ የተባሉ ሰዎች ጋር ሁሉ ፎቶራፌንና አድራሻዬን እየበተንኩ ባለበት አንድ ወቅት ላይ ከጓደኞቼ ጋር ሻይ ልንጠጣ አንድ ካፌ ውስጥ ገባን፡፡ ወደ ካፌው ስንገባ ቴዎድሮስ ተስፋዬ ከሌሎች የፊልም ባለሙያዎች ጋር ቁጭ ብሎ ስገባ በጣም ያየኝ ነበር፡፡ ጓደኞቼ እሱ እኮ ብዙ ፊልሞችን ይሰራል ለምን አታናግረውም አሉኝ፡፡ ለማናገር ድፍረት ስላጣሁ በወረቀት ፅፌ ልሰጠው አሰብኩና እየፃፍኩ እያለሁ እነሱ ተነስተው ወጡ፡፡ ተከትያቸው ወጣሁና ቴዎድሮስን አስቁሜ ተዋወኩት፡፡ ፊልም መስራት እንደምፈልግም ነገርኩት፡፡ እኛም እኮ እያየንህ ነበር፡፡ እዚህ ሀገር የምትኖር ስላልመሰለን ነው እንጂ በልባችን እያጨንህ ነበር አለኝ፡፡ አመስግኜ በቀጣዩ ቀን 522 የተባለውን ፊልም ስራ ጀመርኩ ማለት ነው፡፡

522 እና ለአባቷ የተባሉት ፊልሞች በአንድ ወቅት ላይ የተሰሩ ፊልሞች ናቸው፡፡ እንደውም ለአባቷ በተባለው ፊልም ላይ ዕድሜው ለካራክተሩ አይመጥንም ተብለህ ፂምህን ለማሳደግና ትልቅ ሰው ለመምሰል መከራህን ስታይ ነበር…?
ልክ ነው፡፡ እኔ ለራሴ በዛን ወቅት ፊልም የመስራት ፍላጎቴ እጅግ ያየለበትና ለመስራት በጣም እፈልግ የነበረበት ጊዜ ነበር፡፡ ደግሞ ይህ ለአባቷ የተባለው ፊልም ድርሰቱ የአዶኒስ ነበር፡፡ እስቲ አስቢው የአዶኒስ ድርሰት የሆነን ምርጥ ስራ ዕድሜ አይመጥንም ተብለሽ እንዳትሰሪ ስትከለከይ…? እናም ፂሜን ለማሳደግ ጉንጬን ሁሉ ፍቄው ትልቅ ሰው ለመመስል በአለባበሴ ሁሉ በጣም ጥረት አደርግ ነበር፡፡ ካራክተሩን ለመስራት ከተመረጡት ልጆች ጋር ወደ አዱኒስ ጋር ሄድንና ተፈተንን፡፡ አዱኒስ እኔን መረጠኝና መስራት ጀመርኩ ማለት ነው፡፡ ይህንን ፊልም ስንሰራ ጋሽ ሃይማኖት ዓለሙ ለ3 ወራት ስልጠና ሰጥቶን ነበረ፡፡ ጋሽ ሃይማኖት ጥሩ ነገር አለህ ጠብቀው፡፡ ከሰራህ ትልቅ ቦታ ትደርሳለህ ትልቅ ተስፋ አለህ ሲል አበረታቶኝ ነበር፡፡ በዚህ አጋጣሚ ጋሽ ሃይማኖትንና አዱኒስን በጣም ላመሰግናቸው እፈልጋለሁ፡፡

አንድ ሰሞን ደግሞ ዕለተ ሰንበትን የብዙ ሚሊዮኖችን ዓይንና ቀልብ ስበህ በቴሌቪዥን መስኮት ላይ እንዲያፈጡ ማድረግ ችለህ ነበር፡፡ እስቲ ስለገመና ድራማ አጫውተኝ፡፡ ለድራማው እንዴት ተመረጥክ?
ወደ ገመና ድራማ የገባሁት እንደፊልሙ ሁሉ በአጋጣሚ ነበር፤ እኔ ለገመና ድራማ ካስት ከመደረጌ በፊት የድራማው ሰሪዎች ለካራክተሩ ብዙ ተዋናይ ሲያዩና ሲመርጡ ቆይተው ነበር፡፡ እኔ ጋር ተደውሎ ከገመና ድራማ ቢሮ ነው ስባል በአጋጣሚ እኔ ከጓደኞቼ ጋር ወደ ክፍለ ሀገር ለመዝናናት እየሄድን ነበር፡፡ ከዛ በፊት በቴሌቪዥን የሚታይ ረዥም ድራማ እምብዛም ባለመኖሩና ብዙም ያልተለመደ ነገር ስለሆነ ሁኔታው ብዙም አላጓጓኝም፡፡ ግን አንዳንዴ ደግሞ ደመነፍስሽ የሚግርሽ ነገር አለ፡፡ እስቲ ሄጄ ልሞክረው አልኩና ጓደኞቼን እኔ ሰዎቹን ካነጋገርኳቸው በኋላ እንደምከተላቸው ነግሬ ተሰናበትኳቸውና ወደ ገመና ቢሮ ሄድኩኝ፡፡ ገና ወደ ቢሮው ስገባ በጣም የሚያስደነግጥና የሚያስገርም ነገር አየሁ፡፡ ያም አዱኒስን ለማየት መቻሌ ነበረ፡፡ እሱም እንዳየኝ ነው ያወቀኝ፡፡ በቀድሞ ካራክተሬ ስም ናቲ ሲል ጠራኝ፡፡ ለካ ማደግም መርዘምም ይቻላል ማለት ነው አለኝ፡፡ ከዛም ስክሪፕቱን ሰጠኝና ወጣሁ፤ ስራውን ይችለዋል ተብሎ እምነት ስለተጣለብኝ በደንብ ለማጥናትና ጥሩ አድርጌ ለመተወን ጥረት ማድረጌን ቀጠልኩ፡፡ ካራክተሩ በምን ህይወት ውስጥ ነው ያለፈው? ችግሮች ሲያጋጥሙትስ እንዴት ነው የሚያልፋቸው? የሚሉትን ጉዳዮች ለማወቅና ካራክተሩን በደንብ ለማጥናት ሞከርኩ፡፡ ካራክተሩን የምገልፅበትን መንገድ ማሰብ ስራዬ አደረኩት፡፡ ሚኪ አኗኗር፣ አስተዳደግና አመለካከቱ ሁሉ በደንብ እንዲገባኝ አደረኩ፡፡ ሚኪ ያፈቀረው የቤት ሠራተኛቸውን ነው፡፡ ይህ ደግሞ ፍቅሩን በቀላሉ ለመግለፅ እንዳይችል እንቅፋት ሆኖበታል፡፡ እናም ሚኪ ፍቅሩን ለመግለፅ የሚጠቀምበት መንገድ ለየት ያለ መሆን መቻል አለበት፡፡ ፈታኝ ነገር ነበር፡፡ ገና እኔ እንደምሰራው ተወስኖ ተሰጠኝ፡፡ በፊት ሁሉ ኦዲሽን ላይ እየሰራሁ ሳይታወቀኝ እምባዬ ሁሉ ዱብዱብ ይል ነበር፡፡ የልጁ ጉዳት ገባኝ፡፡ እናም ፈተና ላይ ስራዬን ሲያየው አዱኒስ በቃ አንተ ነህ ይህንን ካራክተር የምትሰራው፡፡ ስለዚህም ተዘጋጅ አለኝ፡፡ ማመን ሁሉ አልቻልኩም፡፡ በጣም ደስ አለኝ፡፡ አዱኒስን በሚያህል ትልቅ ሰው መመረጥና ከእሱ ጋር መስራት ለእኔ በጣም ትልቅ ነገር ነው፡፡ በወቅቱ የተሰማኝን ደስታ መግለፅ አስቸጋሪ ነበር፡፡

የገመናው ሚኪ ላንተ ምን አይነት ስሜት ነው የሰጠህ? ጥሩ ተውኜዋለሁ ብለህስ ታስባለህ?

ሚኪ ፈታኝ ካራክተር ነው፡፡ እኔ በሚኪ ታሪክ ውስጥ ያለፍኩ ሰው አይደለሁም፡፡ የሚኪን ስሜት መግለፁ ወይንም እንደሚኪ ሆኖ ህመሙን መታመሙ ለእኔ ከባድ ነገር ነው፡፡ ግን ደግሞ መሆን ነበረበት፡፡ የሚኪ ስቃይ ሊሰማኝ፤ ህመሙ ሊያመኝ ይገባል፡፡ ይህ ደግሞ ከአንድ ተዋናይ የሚጠበቅ ጉዳይ መሆኑን አምናለሁ እና ካራክተሩን በደንብ ለመላበስ ጥረት አደረኩኝ፡፡ ያው እንግዲህ እንዳየሽው በተወሰነ ደረጃ ተሳክቶልኝ ነበር ብዬ አስባለሁ፡፡ ገመና ድራማ ለእኔ በጣም ስሜት ሰጥቶኝ ወድጄው የሰራሁት ድራማ ነው፡፡ መሆን የምመኘውን አይነት ካራክተር ነበር የሰራሁት፡፡
መሆን የምመኘው ስትል?

የሚኪ አይነት ፍቅር እንዲኖረኝ እንደ ሚኪ ማፍቀር እንድችል እመኛለሁ፡፡ ቀዝቀዝና ረጋ ያለ ባህሪይ ያለው፣ አስተዋይና በትምህርቱ ጎበዝ ነው ሚኪ፡፡ ይህ ባህሪይ የእኔም እንዲሆን እመኛለሁ፡፡
አንተ በባህሪይህ ምን አይነት ሰው ነህ? አፍቃሪ ነህ?
እኔ ለፍቅር ልዩ ቦታ አለኝ፡፡ ስስ ልብ ነው ያለኝ፡፡ ለፍቅር ቶሎ የሚሸነፍና በቀላሉ የሚጎዳ አይነት ማለት ነው፡፡ እርግጠኛ ካልሆንኩኝ በስተቀር ነገሮች ውስጥ መግባት አልፈልግም፡፡ የሚኪን ካራክተር የወደድኩትም ባመነበት ነገር ላይ የሚቻለውን መስዋዕትነት ሁሉ ከፍሏል፡፡ ሲያፈቅር ያፈቀረው ከልቡ ነው፡፡ ያን ስሜቱን ስሜቴ አድርጌ ለእሱ የተሰማው እኔንም እንዲሰማኝ ሆኜ መተወን ይገባኝ ነበር፡፡ ለእኔ ፊልም ወይንም ትወና መምሰል ሳይሆን መሆን ነው፡፡ እናም ሚኪን ሆኜ ስሜቱን ስለተጋራሁት መግለፁና ለተመልካች ማሳየቱ ብዙም አላስቸገረኝም፡፡ ድራማውን ከተከታተልሽው አብዛኛውን ጊዜ በንግግር ከምገልፀው ጉዳይ ይልቅ በአስተያየቴና በሁኑታዬ የምገልፀው ጉዳይ ይበዛ ነበር፡፡ ከገመና ድራማ ላይ የማረሳው አንድ ትዕይንት ነበር፡፡ በድራማው ላይ የእኔ ሴት ጓደኛ ከዩኒቨርሲቲ ጠፍቼባት ፈልጋ አግኝታኝ የሆንከውን ነገር ንገረኝ እያለች የምትጠይቀኝ ትዕይንት ነበር፡፡ እሷ ስለእኔ የምታወቀው ጉዳይ የለም፡፡ እኔ ደግሞ በቤት ሠራተኛዋ ፍቅር ተሸንፌያለሁ፡፡ ሁለቱን ስሜቶች ማስተናገድ ነበረብኝ፡፡ ካራክተሩ የሰው ጉዳት የሚሰማው ለሰው አጥብቆ የሚያስብ አይነት ካራክተር ነው፡፡ ልጅቷ ጥሩ ፍቅር እየሰጠችው ነው፡፡ ለእሱ ጥሩ ጓደኛው ናት፡፡ እሱ ደግሞ እዚጋ በሌላ ሴት ፍቅር ተሸንፏል፡፡ እሱ እዛጋ እየሆነ ያለውን ነገር እሷ እዚህ ጋር እየሆነችለት ነው፡፡ ስለዚህ ሁለቱን ነገሮች ማቻቻልና ስሜታቸውን መጠበቅ ነበረበት፡፡ እሱ (ካራክተሩ) የወደዳት ልጅ እምቢታዋን ብትገልፅለት የሚሆነውን ያህል እዚህ ጋር ያለችው ሴትም በእሱ እምቢታ ልትጎዳ ትችላለች፡፡ እንደ ፊልም ሳይሆን እንደ ህይወትም ስታስቢው እውነታው ይኸው ነው፡፡

በድራማው ላይ ያንተ ካራክተር በጣም ተወዳጅ ካራክተር ነበር፡፡ እንደውም በኤስ.ኤም.ኤስ ከፍተኛውን ቁጥር ያገኘኸው አንተ ነበርክ፡፡ በተለይ ደግሞ በርካታ ሴቶች ናቸው ላንተ ድምፃቸውን የሰጡህ…?
ድራማው እየሄደ ባለበት ወቅት ላይ ብዙ ሰዎች በተለያዩ መንገዶች ስሜታቸውን ይገልፁልኝ ነበር፡፡ ጥሩ ስራ ነው፡፡ ደስ ብሎን ነው የምንከታተለው ያሉኝ ነበሩ፡፡ ይህ ለእኔ ትልቅ ነገር ነበር፡፡ ስራዬ ተመልካች ውስጥ ገብቶ መወደድ መቻሉ የሆነ ነገር መፍጠሩ ደስ ይለኛል፡፡ አንዳንዴ እኮ በሆነ ስራ ውስጥ ገብተሽ የለሽም አለሽ… ልትባይ ሁሉ ትችያለሽ፡፡ ይህ ህመም ነው፡፡ መኖርሽና አለመኖርሽ ምንም ልዩነት በማያመጣበት ሁኔታ ውስጥ መሆንሽ ስሜት ይጎዳል፡፡ ሰው አንቺን ሲያይ ደስ ብሎት አክብሮቱንና ፍቅሩን ሲያሳይሽ ትልቅ ነገር እኮ ነው፡፡ ያው የብዙ ሰዎችን ድምፅ ያገኘሁበት ምክንያትም ይኸው ነው ብዬ ነው የማስበው፡፡

እስቲ ስለ አዲሱ ፊልምህ አጫውተኝ፡፡ አሁን ደግሞ ከተዋናይነት ሌላ በፕሮዲዩሰርነትም ብቅ ብለሃል፡፡ ፍቅሬን ያያችሁ እንዴት ተሰራ? ምን ያህል ገንዘብና ጊዜ ወሰደብህ?

ፍቅሬን ያያችሁ ራሴን የፈተንኩበት ስራ ነው ብዬ አስባለሁ፡፡ አንዳንድ ጊዜ ከሕይወት ጋር እልህ ትጋቢያለሽ፤ እኔ ከሰዎች ጋር ተፎካክሬ አላውቅም፡፡ ሁልጊዜም ፉክክሬ ከራሴ ጋር ነው፡፡ በፊልሜ ተመልካቹ ውስጥ የሆነ ነገር መፍጠር እፈልጋለሁ፡፡ እኔ ዛሬ ላለሁበት ደረጃ እንድደርስ ያደረጉኝ ሰዎች ከእኔ ብዙ ነገር ይጠብቃሉ፡፡ ተመልካቹም ፊልሜን ለማየት ሲገባ ብዙ ነገር መስዋዕት አድርጎ ነው፡፡ ጊዜውን፣ ገንዘቡን ሁሉ፡፡ ስለዚህም ከፊልሙ የሆነ ነገር አግኝቶና ተደስቶ እንዲወጣ ነው ፍላጎቴ፡፡ እናም ያለኝን እውቀት፣ ጊዜና ገንዘብ ሁሉ ሙጥጥ አድርጌ ነው የተጠቀምኩት፡፡ ለዚህም ነው ፊልሙ የተዋጣ ጥሩ ስራ የሆነው፡፡ በገንዘብ ረገድ ምን ያህል ወጣበት ላልሽው ይህንን ያህል ነው ብዬ በቁጥር ለመግለፅ ባልችልም ብዙ በጀት ተመድቦለት የተሰራ ፊልም ነው፡፡ ከጊዜ አንፃር ደግሞ አንድ ዓመት ያህል ፈጅቶብኛል፡፡

ተሳክቶልኛል ወይም የተዋጣ ስራ ነው ብለህ ታስባለህ?

አምናለሁ፡፡ ስኬት ላልሽው ግን ለእኔ ስኬት ማለት ገና ስራውን ስጀምር እዚህ ጋ ብደርስ ብዬ ያሰብኩት ነገር ነበርና እዛ ጋ መድረስ መቻሌ ስኬት ነው፡፡ አንድን ነገር ለመስራት ስትነሺ እወጣዋለሁ ብለሽ ማመን አለብሽ ከጅምሩ አልወጣውም ብለሽ ካሰብሽ ቀሽም ነሽ፡፡ በዚህ ፊልም ላይ ብዙ አዳዲስ ነገሮች አሉት፡፡ እኛነታችንን የሚያሳዩ ነገሮችንም ለማሳየት ሞክረናል እንግዲህ ቀሪው ጉዳይ የተመልካች ነው፡፡

በፊልም ላይ ፕሮዲዩሰሩም ዋና ገፀባህሪውም አንተው ሆነህ ነው የሰራኸው፡፡ ይሄ ነገር አያስቸግርም ነበር፡፡ ፕሮዲዩሰርነቱንና ተዋናይነቱን አብሮ ማስኬዱ አላስቸገርህም?

ከባድ ነው፡፡ እውነት ለመናገር በጣም ከባድ ነው፡፡ በፕሮዲዩሰርነቴ የሚጠበቁብኝ ኃላፊነቶች አሉ፡፡ እሱን በአግባቡ መወጣት መቻል አለብኝ፡፡ ተመልካቹ ካንቺ ምንም አይነት ምክንያት መስማት አይፈልግም፡፡ የተዋጣ ስራ ማየት ይፈልጋል፡፡ ይህ ደግሞ ልክ ነው፡፡ ስለዚህ በተቻለ መጠን በቀረፃ ወቅት ከካራክተሬ ውጪ ስለምንም ነገር ማሰብ አልፈልግም፡፡ ሁሉም ነገር የራሱ ሰው እንዲኖረው አድርጌ አክቲንጌ ላይ ብቻ ነው የማተኩር የነበረው በእርግጥ ተዋናይ ብቻ ሆነሽ ስትሰሪ የበለጠ ነፃነቱ ጥሩ ነው፡፡ ስለሌላው ጉዳይ የሚጨነቀው ሌላ ሰው ነው፡፡ ፕሮዲዩሰርም ስትሆኚ ግን ጭንቀትሽ ይበዛል፡፡ በሁሉም ትዕይንት ውስጥ ያንቺ ሀሳብና ስራ ሊኖር ግድ ነው፡፡ ተዋንያኑን ማስተባበር፣ የቀረፃ ቦታዎችን ምቹ ማድረግ፣ ቀረፃሽን ሳትጨርሺ ውጪ እንዳትባይ ስጋቱ፣ ሁሉም ነገር ከባድ ነው፡፡ ግን ደግሞ አክተር ሆነሽ ፕሮዲዩሰር ስትሆኚም የራሱ የሆነ ጥቅም አለው፡፡ ተዋናዩ ፊልሙ አሪፍ እንዲሆን የሚያስፈልገውን ነገር ያውቀዋል፡፡ እሱን ለማሟላት ደግሞ የማንንም በጎ ፈቃድ አይጠይቅም፡፡ ራሱ አስፈላጊ ነገር ሁሉ ያደርጋል፡፡ ይህ አሪፍ ነገር ነው፡፡

በዚህ ፊልም ስራ ወቅት በጣም ከስተህና ኪሎህን ቀንሰህ ነበር፡፡ በጤና ነው?

አዎ! ወደ 10 ኪሎ አካባቢ ቀንሼ ነበር፡፡ የቀነስኩት ግን መቀነስ ፈልጌ አልነበረም፡፡ እኔ የተጫወትኩት ካራክተር በጣም ያሳዝን ነበር፡፡ እንደ እሱ ሰው ሳያውቃቸውና ሳይረዳቸው ኖረው የሚያልፉ ሰዎች ሁሉ አሉ፡፡ እናም ለካራክተሩ ታማኝ መሆን ፈለኩ፡፡ የእሱን ኑሮ መኖር፣ እንደ እሱ ማሰብ ፈለኩ፡፡ በዚህ ጥረቴ ውስጥም አመጋገቡን እንደ ባህሪይ ውስጤ አስገብቼው ነበር፡፡ ካራክተሩ ንፁህ ነገር ይፈልጋል፣ ጥቂት ይመገባል፣ በስራው ላይ መቀለስ አይፈልግም፡፡ ለስራው ያለው ክብር የተለየ ነው፡፡ ምክንያቱም ራሱን ደብቆ የሚኖረው እዛው ስራው ውስጥ ነው፡፡ ማንም በዚህ ሰርክል ውስጥ ገብቶ እንዲረብሸው አይፈልግም፡፡ ይህ ነገሩ በጣም መሰጠኝ፡፡ እናም እስኪ ልኑረው ብዬ አሰብኩ፡፡ በዛ ሙከራ ውስጥ ነው ኪሎዬንም የቀነስኩት፡፡

በዚህ ፊልም ስራ ወቅት አስቸጋሪ ነበር የምትለው ጊዜ ነበር?

አዎን! 3 አስቸጋሪ ጊዜያቶችን አሳልፌ አለሁ፡፡ የመጀመሪያው ገና ስክሪፕት እየመረጥኩ ባለበት ጊዜ ነው፡፡ ሁለተኛው ደግሞ ፕሮዳክሽን ከተጀመረ በኋላ ይህንን ነገር እወጣው ይሆን የሚለው ነገር በጣም ያስጨንቅ ነበር፡፡ ፊልሙ አልቆ ወደ ተመልካች ሲመጣ ደግሞ ሌላ ጭንቀት ነው፡፡
እንደተዋናይ ለዚህ ፊልም ትወና ምን ያህል ተከፈለህ? ወይንም ምን ያህል ሊከፈለኝ ይገባል ብለህ ታስባለህ?
እንደተዋናይ በዚህ ፊልም እስከ 300 ሺ ብር ድረስ ክፍያ ይገባኛል ብዬ አስባለሁ፡፡ ምክንያቱም በዚህ ፊልም ስራ ምክንያት የመጡልኝን ሌሎች በርካታ ፊልሞች መልሻለሁ፡፡ ፊልሙ ቢዚ አድርጎኝ ነበር፡፡

አብረህ ማስኬድ አልቻልክም ነበር?

ካራክተሩ በጣም ይፈልገኝ ነበር፡፡ ከእኔ ጋር ረዥም ጊዜ መቆየት ነበረበት፡፡ ካራክተሩ ቅድም እንዳልኩሽ ከእኔ የተለየ ሰው ነው፡፡ በአስተሳሰብ፣ በአኗኗር፣ በዕድሜ፣ በአስተዳደግ፣ ባለፈበት የህይወት ተሞክሮ ሁሉ ከእኔ ይለያል፡፡ እናም ካራክተሩ ውስጥ ገብቶ መጥፋት ያስፈልገኝ ነበር፡፡ እዚህ ጋ ሌላ እዚያ ጋ ደግሞ ሌላ ሰው ሆነሽ የምትሰሪው አይነት ካራክተር አልነበረም፡፡ ሌሎች ስራዎችን መስራት አልቻልኩም፡፡
ወደ ሞዴልነትና የማስታወቂያ ስራ ባለሙያነትህ ደግሞ እንመለስ፡፡ በሞዴልነት በቋሚነት እየሰራህ ነው? ከስማደል ሞባይልስ ጋር የገባኸው የማስታወቂያ ውል እንዴት ነው? በቋሚነት…? ለአገር ውስጥ ብቻ?… እስቲ ስለሱ ደግሞ እናውራ?
በማስታወቂያ ስራ ከአስር በላይ ማስታወቂያዎች ላይ ሰርቻለሁ፡፡ ሙያውን እወደዋለሁ፡፡ ሙያሽን ወደሽ የምትሰሪው ከሆነ ታከብሪዋለሽ ካከበርሽው ደግሞ የሚፈልገውን ሁሉ ለመስጠት ጥረት ታደርጊያለሽ፡፡ በማስታወቂያ ስራዎቼ ላይ የምተገብረውም ይህንኑ ነው፡፡ ከስማደል ሞባይል ሰዎች ጋር የተገናኘሁትና ማስታወቂያዎችን መስራት የጀመርኩት በአጋጣሚ ነው፡፡ የሆነ ቦታ እራት እየበላን ሰዎች እየመጡ ከእኔ ጋር ፎቶ ሲነሱ አዩና ለማስታወቂያ ስራ እንደሚፈልጉኝ ነገሩኝ፡፡ በቃ በዚሁ መንገድ ነው የተጀመረው፡፡ አሁን ለጊዜው እየሰራን ያለነው ኢትዮጵያ ውስጥ ነው፡፡ ወደፊት ግን ወደሌሎች ሀገራትም ለመሄድ ሀሳብ አላቸው፡፡ በሞዴልነት ሞያ ትላልቅ መድረኮች ላይ በሀገር ውስጥም ከሀገር ውጪም ሰርቻለሁ፡፡ ሸራተን፣ ሚሌኒየም አዳራሽና ሒልተን ሆቴል በሀገር ውስጥ ከሰራሁባቸው ትላልቅ መድረኮች መሀል ሲጠቀሱ ከሀገር ውጪ በአሜሪካ፣ ሜሪላንድ ውስጥም ሰርቻለሁ፡፡ አሁን በቋሚነት ከዮሐንስ ጥበብ ጋር በሞዴልነት እየሰራሁ ነው፡፡

በበጎ ፈቃድ ስራዎች ወይንም በህፃናትና አረጋውያን መረጃ ድርጅቶች ውስጥ በመግባት እንቅስቃሴ ታደርጋለህ ይባላል፡፡ ምን ያህል እውነት ነው?

የበጎ ፈቃድ ተግባር ላይ መሳተፍ እወዳለሁ፡፡ ከሜሪ ጆይ የአረጋውያን እና የህፃናት መረጃ ድርጅት፣ ከመሰረት በጎ አድራጎት ጋር እሰራለሁ፡፡ አሁን ፊልሜን ሳስመርቅም አቅሜ የፈቀደውን ለእነዚህ ድርጅቶች ለማድረግ ሞክሬያለሁ፡፡ ይህንን ተግባር ወደፊትም አጠናክሬ እንደምቀጥልበት አምናለሁ፡፡

እንደው ያ የፋርማሲስትነት ሞያህ ቀረ ማለት ነው? ውሃ በላው?

አልቀረም፡፡ ወደፊት በሙያዬ አንድ ቋሚ የሆነ ነገር የመክፈት ሀሳብ አለኝ፡፡ እንደ ፋርማሲ ያለ ማለቴ ነው በትምህርቴም የተሻለ ደረጃ ላይ የመድረሱ ዕቅድ አለኝ፡፡
ዕቅዶችህ እንዲሳኩና የተሻሉ ስራዎችህን እንድናይ እንመኛለን፡፡

አመሰግናለሁ፡፡ በዚህ አጋጣሚ ለተሰጠኝ ዕድል ምስጋናዬ ላቅ ያለ ነው፡፡

ሚኪያ በሀይሉን በሀዘን ላጣችሁ ሁሉ ፈጣሪ አምላክ መፅናናትን ይላክላችሁ!

በስመአብ ወወልድ ወመንፈስ ቅዱስ አሀዱ አምላክ አሜን! የእግዚያብሔር አብ ቸርነት፤ የድንግል ማሪያም አማላጅነት፤ የልጇ የእየሱስ ክርስቶስ ምህረት፤ የመንፈስ ቅዱስ ፀጋና በረከት፤ የጻድቃን ሰማዕታት ተራዳኢነት እህታችንን በሀዘን ከተነጠቅነው ቤተሰቦች፤ ዘመዶች፤ አብሮአደጐች፤ጐረቤቶች፤ ጓደኞችና የጥበቧ አፍቃሪዎች ጋር ሁሉ ይሁን አሜን! እሱ ሀያሉ አምላክ ልዑል እግዚያብሔር ብርታቱንና መፅናናቱን ለሁላችንም ይስጠን አሜን።

የኛ የሚኪያ አብሮ አደጐች ሀዘን ጥልቅና የመረረ ቢሆንም የውድ ቤተሰቦቿ፡ የቅርብ ዘመዶቿና የቦንቱ ናንሲ ሀዘን ግን ከእኛ በላይ የከበደ መሆኑን ከቅርብና ከሩቅ ሆነን በሚገባ ተረድተናል። በልጅነት ዕድሜ በቤተልሔም ት/ቤት ውስጥ አብረናት ያደግነው የእሷ ዘመን ተማሪዎች ከሀገር ውስጥም ሆነ ከባህር ማዶ ሁነን ውድ እህታችንን በሀዘን ስናስባት ሀዘናችሁ የእኛም ሀዘን መሆኑን በዚህ አጋጣሚ በመግለፅ ጭምር ነው። ሚኪያ
ከእኛና ከብዙዎቻችው ዘንድ በአካል የተለየች ነገር ግን በውስጣችን ህያው ሁና የምትኖር የዘመናችን ዕንቁ ወጣት ነች። እግዚያብሔር
መርጦ የሰጣትን የተፈጥሮ ችሎታ ያልቀበረች፤ ይልቁንም ለበጎ አላማ የተጠቀመችበትና ሀገርንና ህዝብንም በዓለም አቀፍ ደረጃ ለማስጠራት የሞከረች የሀገርና የህዝብ ወኪልም ነበረች። ብዙ ታአምር መስራት በምትችልበት የለጋነት ዕድሜ በአምላኳ ፈቃድ በመጠራቷ ድንጋጤውና ሀዘኑ ቅስማችንን ቢሰብረውም ትታልን በሄደችው ቅርስና ጥበብ ግን ወደፊት ስንዘክራት እንኖራለን። አብረናት ባደግንባቸው በእነዛ የማይተኩ የልጅነት ዘመናት ውስጥ ያጠራቀምናቸው ትዝታዎች እንዲህ በቀላሉ የሚዘነጉና
ከአዕምሮአችን የሚጠፉ ባለመሆናቸው ምናልባት አንድ ቀን እሷንና ብዙዎቻችንን ያስተሳሰረውን የአብሮ አደጐች ትዝታ የምንተርክበት
አጋጣሚ ወደፊት ይመጣ ይሆናል ብለን ተስፋ እናደርጋለን። ፈጣሪ አምላክ ነፍሷን ከአብርሃም ከያዕቆብና ከይስሐቅ ጐን ያሳርፍልን። ምህረትን ሰጦ ነፍሷን ይማርልን። እናንተን ውድ ቤተሰቦቿንም ብርታቱን፤ መፅናናቱንና ጥንካሬውን በቶሎ ይላክላችሁ እንላለን።

ከቤተልሔም ት/ቤት የልጅነት ጓደኞቿ

Yebethlehembach1990@yahoo.com

ነፍስ ይማር

ከዚህ በታች ያለውን ግጥም ምትክ ለማናገኝላትና ገና በወጣትነት ዕድሜ ድንገት ለተለየችን ገጣሚና ታዋቂ ድምጻዊ ሚካያ በሀይሉ ሳበረክት ከህጻንነት ዕድሜ ጀምሮ በቤተልሔም ት/ቤት ውስጥ አብረናት ባደግነው የእሷ ዘመን ተማሪዎች ስምና ከእኛ ዕድሜ በላይ እንዲሁም በታች በዛው ት/ቤት ውስጥ በተማሩ ተማሪዎች፤ መምህራኖችና ሰራተኞች ስም ጭምር ነው። የሚኪያ ድንገተኛ ህልፈት በተለይ ከሀገረ ኢትዮጵያ ተለይተው በምዕራቡና በተለያዩ ዓለም ሀገራት ለረጅም ዘመን የሚኖሩትን የቅርብ ቤተሰቦች፤ ዘመዶች፤ አብሮ አደጐችና የጥበቧ አፍቃሪዎች ከማሰደንገጡም በላይ ለረጅም ዘመን በአካል ሳያገኟት በለጋነት ዕድሜ በመለየቷ የተሰማቸውን ከባድ የሀዘን ስሜት በአይነ-ህሊናዬ እንዳስተውለው አድርጐኛል። ህልፈቷን ድንገት በሰማሁበት ወቅትም የተሰማኝ ከፍተኛ የሀዘን ስሜት ከብዙዎቻችሁ ስሜት ጋር ይመሳሰል ይሆናል ብዬ ስለገመትኩ እንደ ፀበል ተረጭቶ የደረሰኝን በጣም ትንሽ የግጥም ስጦታ በመጠቀም የብዙዎቻችንን የሀዘን ስሜት (ከገለፀው በሚል) ከዚህ በታች እንደሚከተለው በግጥም ደረደርኩት ።

ከቅጥርዋ ግቢ ከሚሞቀው ጓዳ

ያቺ ቤተልሔም ኮከብ ወልዳ ወልዳ

እኔን ለምስክር እነሱን ለትንግርት ደባልቃ አሳድጋ የማልከፍለውን ሞት እንደ ብድር አርጋ

በል ክፈል አለቺኝ ሚካዬን በዕዳ።

ምነው እትዬ ቆንጂት ምነው ጋሽ አዲሱ?

በተቀደሰው ቀን መርዶን ማርዳታችሁ በዕለተ ሐሙሱ። ባሕር ማዶ ሆኜ ድምጿን ባየር ሞገድ ስጠብቅ በተስፋ

ቪኦኤ አረዳኝ ሳያስጠነቅቀኝ ገላልጦ በይፋ። መርዶ ሞገድ ሆኖ ባሕር ተሻገረ
ደረት መቶ መቅበር ሳልስት መቀመጥ 40 ማውጣት ቀረ።

ያ የጥበቦቸ ቤት የምርጦቸ መፍጠሪያ

ቴድሮስን የሰጠን ሚኪያን የሰጠን ለሀገር ማስጠሪያ

ምን ብሎ ይሆን ይሆን? ድንገት ሞት ሲነጥቀው ኮከቡን ከጉያ?

አባቷ ወለዱ እናቷ ወለዱ ላገር የምትበቃ ኩሩ ኢትዮጵያዊ

ቅኔውን የምትዘርፍ፤ ወርቁን የምትመዝን፤ሰሙን የምታቀልጥ አማላይ ድምፃዊ ግና ምን አተረፍን?
አስር ሀያ አመት አይኖችሽን ሳናይ አይናችንን ሳታይ ከአንጀት ተነፋፍቆ በሬዲዮ ሞገድ ለዛውም በግላጭ መርዶሽን ጠብቆ
በባይተዋር አገር በባዕዳን ምድር በእንባ ተንሰቅስቆ

ሀዘን ያደማውን የልጅሽን አንጀት እንደ ዝናር ታጥቆ ሰራቂ ድምፅሽን የጥንት ትዝታሽን ዘላለም ሰንቆ
ሚካዬን የሚያክል አብሮአደግ ያገር ልጅ በሀዘን ተነጥቆ እ…ህ….እየተባለ በቁጭት ህይወት ላይ ፀፀትን አጥልቆ ኪሳራ ነው እንጂ ትርፍማ መች ታውቆ!
እንግዲህ ቤተሎች እርማችሁን አውጡ ድፍን ኢትዮጵያዎች እርማችሁን አውጡ የድምጿ አፍቃሪዎች እርማችሁን አውጡ አምላክ የጠራትን ምትክ ላታመጡ። ከዚህ ክፉ ምድር የሱ-ዓለም ተሽሎ የፈጠራት አምላክ ልውሰድሽ ነኝ ብሎ በሰማዪ ገነት አኖራት ጨክኖ።
እንግዲህ ዘምሪ ከነኪሩቤል ጋር ከመላዕክቶች ጋር አውርጂ ምስጋና

ድሮም ስጦታሽ ነው ድምፅ ማንቆርቆሩ ማስረቅረቅ በዜማ። እኛ ግን……….
ነፍስ ይማር፤…. ነፍስ ይማር፤….. ነፍስ ይማር….. ብለናል

ለእናትና አባቷ ለምትክ ልጇ፤ ለስጋዋ ክፋይ መፅናናት ልከናል።

ደረጀ ሙሉጌታ ተፈሪ ከአትላንታ

Yebethlehembach1990@yahoo.com

ከኢየሩሳሌም አረአያ

አሜሪካ መኖር ከጀመረ 16 አመት አለፈው። ለፍቅር ሲል ከፍተኛ መስዋእትነት የከፈለ ታዋቂ አርቲስት ነው። እጅግ ለሚያፈቅራት ልጅ አቀንቅኖላታል። ይህ ድምፃዊ፥ አበበ ተካ ነው። “ሰው ጥሩ..” የሚለው የግጥም ድርሰት በህልሙ ነበር የታየው። ፍቅረኛው እታገኝ ሙላው ትባላለች። አቤ በህልሙ “ፍቅረኛውን ጥቅጥቅ ባለ ጫካ ውስጥ እየሮጠ ሲከተላት..ሲሮጥ…ሳይደርስበት ይቀራል። ከዛም ደክሞት ለምለም ሳር በሆነ ሜዳ ቁጭ ብሎ…”ሰው ጥሩ..” እያለ ያዜማል፤”. ህልሙን ለገጣሚ ሙልጌታ ተስፋዬ (ነፍሰ ሄር) ይነግረዋል። ዘፈኑም ተሰራ። “ምንድነው ቀለበት፣.. እንዳንቺ አላየሁም በዝች ምድር ላይ፣.. አገሯ ወዲያ ማዶ፣..በይ ካልረሳሽኝ-ንገሪኝ..” ዜማዎች ለፍቅረኛው እታገኝ የተደረሱ ናቸው።

አበበ ተካ በ1989ዓ.ም “ምርጥ የአመቱ ድምፃዊ” ተብሎ የገንዘብና ወርቅ ሽልማት አግኝቷል። ብዙ ጊዜ መድረክ ላይ ሲዘፍን እንባው ይፈስ ነበር። ምክንያቱ ደግሞ በመለየት ስቃይ ውስጥ አሻግሮ የእርሱ አይነት እጣ (የመለያየት) የደረሰባቸውን እያሰበ ጭምር ነበር።…አበበ በ1990ዓ.ም ለንደን ይጓዛል። በዛው የጣሊያን ፓስፖርት አሰርቶ ፍቅረኛውን ለማግኘት ወደ አሜሪካ ይበራል። እንዳቀደው ግን አልሆነም። ፓስፖርቱ ተመሳስሎ የተዘጋጀ ስለነበረ በአሜሪካ ፖሊስ ተይዞ እስር ቤት ተላከ። 5 አመት ተፈረደበት። ጎንደር ይኖሩ የነበሩት አባቱ አቶ ተካ የልጃቸውን መታሰር እንደሰሙ (በደም ግፊት) ደንግጠው ሕይወታቸው አለፈ። እስር ቤት እንዳለ መርዶ መጣበት።.. አቤ በእስር ቤት በነበረው መልካም ባህርይ 1አመት ከ8 ወር ከታሰረ በኋላ እንዲለቀቅ ተደረገ። በብዙ ፈተና ያለፈበትን ፍቅረኛውን የማግኘት ህልም እውን ሆነ። አበበ አሁን ድረስ ፈጣሪን ያመሰግናል።

ከፍቅረኛው እታገኝ ሙላው ጋር ጎጆ ቀልሰው ሶስት ልጆች አፍርተዋል። ልጆቹ ትእግስት አበበ፣ ብርሃን አበበ፣ አዲስኪዳን አበበ ይባላሉ። አበበ እጅግ ሲበዛ ትሁትና ሰው አክባሪ ሲሆን በዲሲ የሚኖሩ ሃበሾች ትልቅ ከበሬታ ይሰጡታል። ስለእርሱ ሲናገሩ፥ « አበበ የትዳርና ፍቅር ተምሳሌት ነው። ጨዋና ቤተሰቡን አክባሪ ሰው ነው። ብዙ ቦታ ልታይ- ልታይ አይልም። ከስራው መልስ ከቤተሰቡ ጋር ነው የሚያሳልፈው። ስለ ሃገሩ ኢትዮጲያ በየመድረኩ ያዜማል።» በማለት ምስክርነት ይሰጣሉ። በየሳምንቱ ቅዳሜ በ”ዱከም” መዝናኛ የሚዘፍነው አበበ ሲናገር፥ « የሰው ልጅ በተለይ በስደት አገር ያለው ሃበሻ ወገኔ..ከሚወደው አገሩ፣ከቤተሰቡ፣ ከፍቅረኛው…እንዲገናኝ ሁሌም ፈጣሪን እለምናለሁ። የተለያየ ሰው ናፍቆቱን ሳይወጣ ክፉ አይንካው!!

ተነጣጥሎ መኖር ከባድ ስቃይ ነው። የናፍቆትና ብቸኝነት ስቃይን የደረሰበት ያውቀዋል። » ይላል። ከኳስ የቡና ክለብ አድናቂና ደጋፊ የሆነው ድምፃዊ አበበ ሁለተኛ አልበም ሊያወጣ ነው። በአንድ ሰው አገናኝነት ገጣሚና ደራሲ ፋሲል ተካልኝ የላካቸውን ጨምሮ የግጥምና ዜማ ስራዎች ቅድመ ዝግጅት እየተደረገባቸው ነው። በእውነተኛ ታሪክ ዙሪያ የተመሰረቱ እንዲሁም አገርና ህዝብን የተመለከቱ ዜማዎች ይገኙበታል።..የሰው ልጅ ህልሙ ሲሰምር እንዴት ያስደስታል!!

አርቲስት ሚካኤል መሐመድ

ለሁለቱ አርቲስቶች ቅርበት ያላቸው የዘ-ሐበሻ ምንጮች እንዳስታወቁት ባለፈው እሁድ በአል ታዋር ዱባይ ኢንተርናሽናል ኤርፖርት ሰይፉ ፋንታሁን እና ሚካኤል መሐመድ የታሰሩት ቪዛችሁ የተሳሳተ ነው በሚል ምክንያት ነው። ጉዳዩ እስኪጣራ በሚል ሁለቱ አርቲስቶች ለ24 ሰዓታት መታሰራቸውን ያስታወቁት ምንጮቹ ሁለቱም አርቲስቶች በአሁኑ ወቅት በአዲስ አበባ ሥራቸውን እየሰሩ እንደሚገኙ ታውቋል።

ወደ ዱባይ በተደጋጋሚ የሚሄደው ሰይፉ ፋንታሁን እስካሁን ድረስ እንዲህ ያለ ችግር አጋጥሞት እንደማያውቅ ያስታወቁት እነዚሁ የመረጃ ምንጮች በተሳሳተ ቪዛ ታስሮ መፈታቱ እንዳስገረማቸው ጠቁመዋል።

በዚህ መረጃ ዙሪያ ሰይፉ ፋንታሁንን እና አርቲስት ሚካኤል መሐመድን ለማነጋገር ያደረግነው ሙከራ አልተሳካም።

ለግንዛቤዎ
በ2011 ዓ.ም በዘ-ሐበሻ ድረ ገጽ ላይ የታተመውን የሰይፉ ፋንታሁንን ቃለ ምልልስ ለማንበብ እዚህ ይጫኑ

በጥበብ ሙያዋ ከፍተኛ አክብሮት የሚሰጣት አርቲስት ዓለምፀሐይ ወዳጆ ከወደ አውስትራሊያ ከሚሠራጨው ሲቢኤስ ራድዮ ጋር ባደረገችው ቃለምልልስ “ሙያው ያስከበረኝን ያህል ስላከበርኩት፤ ዛሬ ለብዙ ወጣት ሴት ተዋንያኖች መውጣት ምክንያት ሆኛለሁ” አለች። በጥበብ ሥራዎቿ አንቱታን ያገኘቸው ዓለምፀሐይ ወዳጆ ከጋዜጠኛ ካሳሁን ሰቦቃ ጋር ቃል የተመላለሰችበት የድምጽ ዘገባ ክፍል 1 እንደሚከተለው ቀርቧል፦

(ዘ-ሐበሻ) የኢትዮጵያ ሙዚቃ ንግሥት በሚል የምትሞካሸው ድምጻዊት አስቴር አወቀ ካሁን በኋላ የሙዚቃ አልበም ለመሥራት ሃሳብ እንደሌላት የቅርብ ምንጮች ለዘ-ሐበሻ ጠቆሙ። አስቴር ለቅርብ ሰዎቿ አሁን ባለው የሲዲ ገበያ የተነሳ ሙሉ አልበም ሠርቶ ለማቅረብ የሚያበረታታ ነገር የለም ስትል ተናግራለች።

በአሁኑ ወቅት ዘፈኖች በሲዲ ከወጡ በኋላ በተለያዩ በዩቲዩብ፣ በተለያዩ ድረገጾች፣ በፍላሽ ድራይቭ፣ በአይቱን፣ በኢሜይል፣ በሳውንድ ክላውድ፣ በፌስቡክ፣ በራድዮ፣ በጎግል ድራይቭና በመሳሰሉት መካፈያ (ሼር ማድረጊያ) መንገዶች ሕዝቡ ዘፈኖቹን በነፃ ስለሚያገኛቸው የአልበም ሽያጭ እጅጉን አሽቆልቁሏል። ይህን ተከትሎም በርካታ የሙዚቃ አሳታሚዎች በከፍተኛ ኪሳራ ውስጥ መውደቃቸው በተደጋጋሚ እየተገለጸ ነው። ይህ ብቻም ሳይሆን በሕገ ወጥ መንገድ ኮፒ አድርገው ይሸጡ የነበሩ ሰዎች ሳይቀሩ አይደለም የኦርጂናል አልበም ሥራዎች የቅጂ አልበሞች ሳይቀሩ ገበያቸው ወርዶ ገዢ እየቀነሰ ነው ሲሉ ያማርራሉ።

ዘ-ሐበሻ ከተለያዩ ምንጮች ባሰራጫቸው መረጃ በአሁኑ ወቅት ከላይ በተጠቀሱት ዘዴዎች አብዛኛው ሰው ዘፈኖቹን ስለሚያገኛቸው አልበም ገዝቶ ለመስማት ፍላጎት ያላቸውም። ይህም አርቲስቱንም ሆነ አሳታሚዎችን በ እጅጉ እየጎዳ ይገኛል።

ድምጻዊት አስቴር አውቀ በቅርቡ “እወድሃለሁ” በሚል የሠራችው አዲስ አልበም ከፍተኛ ተወዳጅነትን ያስገኘላት ሲሆን በሽያጭ ደረጃ ግን ለአልበሙ የሚመጥነውን ገቢ እንዳላገኘ ድምጻዊቷ እየገለጸች ነው ያሉት የቅርብ ምንጮች ዘፈኖቿን በግሏ አሳትማ በሃገር ቤት ከተሰራጨ በኋላ በውጭው ዓለም ገና ለገበያ ሳይቀርብ ሕዝቡ በነፃ ሼር በማድረግና በኮፒ አዳምጦ እንደጨረሰው ገልጸዋል።

የአስቴር እወድሃለሁ አልበሟ በውጭው ዓለም ሽያጩ ያን ያህል ቢሆንም፤ ተደማጭነቱ ግን ከፍተኛ እንደነበር ድምጻዊቷ እየተዘዋወረች ባቀረበችው የሙዚቃ ኮንሰርቶች ላይ ታይቷል።

“ካሁን በኋላ ሙሉ የሙዚቃ አልበም የምሠራ አይመስለኝም” ያለችው አስቴር በተለያዩ ጊዜያት ነጠላ ዜማዎችን በመሥራት በየ2 ዓመቱ ኮንሰርቶችን በተለያዩ የዓለም ክፍሎች በመዘዋወር ለማቅረብ ሃሳብ እንዳላት የቅርብ ሰዎቿ ለዘ-ሐበሻ ገልጸዋል።

የሙዚቃ አልበም ሽያጭ መውረድን ተከትሎ በርካታ አርቲስቶች ሥራ ይዘው እንዳይቀርቡ ሊያደርጋቸው ይችላል የሚል ፍራቻ አለ።

በዚህ ዙሪያ የዘ-ሐበሻ አንባቢዎች አስተያየታችሁ ምንድን ነው?

(ዘ-ሐበሻ) “የፍቅር ጉዞ” በሚል በሙዚቃዎቹ ፍቅርን ይሰብካል በሚል የሚወደሰው ቴዎድሮስ ካሳሁን (ቴዲ አፍሮ) በሱዳን ካርቱም የፊታችን አርብ ፌብሩዋሪ 21 እና እሁድ ፌብሩዋሪ 23 ሁለት ታላላቅ የሙዚቃ ኮንሰርቶችን እንደሚያቀርብ ከዚህ ቀደም መዘገባችን አይዘነጋም። ቴዲ ለዚህ ኮንሰርት ሱዳን ከገባ በኋላ በካርቱም ለዝነኛው የሱዳን ድምጻዊ መሐመድ ወርዲ በተዘጋጀው የመታሰቢያ በዓል ላይ “ሰበርታ” የተባለውን ተወዳጅ የሱዳን የአረቢኛ ዘፈን በድንቅ ሁኔታ ተጫውቶታል።

ባለቤቱ አምለሰት ሙጬን ከፊት ለፊት አስቀምጦ ለሱዳናውያኑ ያቀነቀነው ቴዲ ከፍተኛ አድናቆትን አግኝቷል። የኢትዮጵያ ሙዚቃዎች በሱዳን በጣም የሚወደዱ ከመሆናቸውም በላይ በተለይ ከ8 ዓመት በፊት ሱዳን የነበረው የዘ-ሐበሻ ዋና አዘጋጅ ሱዳኖች ለቴዎድሮስ ካሳሁን እና ለሃይማኖት ግርማ ልዩ ፍቅር እንደነበራቸው በአይኑ ማየቱን ያስታውሳል። ድምፃዊት ሃይማኖት ግርማ “ዞል ቲቪ” በሚባል የቴሌቭዥን ጣቢያ የፕሮግራም አቅራቢ ሆና እንደነበርም ያስታውሳል።

በካርቱም ቴዲ የፊታችን አርብ እና እሁድ ሥራዎቹን የሚያቀርብ ሲሆን፤ በመሀመድ ወርዲ መታሰቢያ ላይ የተጫወተውን ሰበርታ ሙዚቃ እንጋብዛችሁ፦

በአፍቃሬ ወያኔነቷ የምትታወቀው ድምጻዊት ሃመልማል አባተ አዲስ አልበሟን ለማስመረቅና የተለየያዩ ኮንሰርቶችን ለመሥራት ወደሰሜን አሜሪካ መጥታ የነበረ ቢሆንም በደረሰባት ቦይኮት በተመልካች እጦትና በፕሮሞተሮች መጥፋት አፍራ ወደ አዲስ አበባ መመለሷ ታወቀ።

በአሁኑ ወቅት ኢትዮጵያ ውስጥ በሰብአዊ መብት ጥሶትና ንጹሃንን በእስር ቤት ያሰቃያል እየተባለ በዓለም አቀፍ ተቋማት ጭምር የሚነገርለትን የወያኔ/ኢሕአዴግ ስርዓት በመደገፍ የምትታወቀው ድምጻዊት ሃመልማል አባተ በዋሽንግተን ዲሲ ከፍተኛ ገንዘብ ወጥቶ በቨርጂኒያ ክሪስታል ከተማ በሂልተን ሆቴል የሲዲ ማስመረቂያ ኮንሰርት አዘጋጅታ 55 ሰዎች ብቻ የተገኙ ሲሆን አንድም አርቲስት በሲዲ ምርቃቱ ላይ አለመገኘቱ አነጋጋሪ ሆኗል። በተለይ በዋሽንግተን ዲሲ አካባቢ በርካታ አርቲስቶች የሚገኙ እንደመሆኑ መጠን በሃመልማል አባተ ሲዲ ምርቃት ኮንሰርት ላይ አንድም አርቲስት አለመገኘቱ ኢቢኤስ የተባለው ቲቪ ሳይቀር እንዳስገረመው በወቅቱ መዘገቡ ይታወሳል።

(ሃመልማል በዲሲ አዘጋጅታቸው የነበረውና በተመልካች ድርቅ የተመታው የሲዲ ምርቃት ኮንሰርት ፍላየር ይህ ነበር)

ሃመልማል በዳላስ ከተማ በፋሲል ደመወዝ ስም በመጠቀም፤ (ሕዝቡ የፋሲል ደመውዝ አድናቂ በመሆኑና እርሱን ተከትሎ በመግባቱ) በኮንሰርቱ ላይ ቁጥሩ ጨመር ያለ ሰው ቢገባም በሎስ አንጀለስ ከተማ የቀድሞ ባለቤቷ እና የልጇ አባት በሚያስተዳድረው ሮዝሊን የሲዲ ምርቃትና ኮንሰርት ብታዘጋጅም በተመሳሳይ ቦይኮት ተደርጋ በተመልካች ድርቅ ተመትታለች። በዚህም ሞራሏ የተሰበረው ሃመልማል ከስህተቷ ተምራ ወደ ሕዝብ ከመመለስ ይልቅ ወደ ሃገር ቤት በመመለስ ነገሩን ለማብረድ ብትሞክርም እንዲህ ያለው ቦይኮትና በየከተማው ያሉ ፕሮሞተሮች ያለመጋበዝ ትግል ታግዞበት ወደ ሃገሯ ልትመለስ በቅታለች።

ዲያስፖራው ከወያኔ ጋር በጥቅም የተሳሰሩ ድምጻዊያንን ቦይኮት ማድረጉ የሚያስመሰግን ነው የሚሉ አስተያየት ሰጪዎች ይህ ጉዳይ በርትቶ ሊቀጥል እንደሚገባው አስታውቀዋል። እነዚሁ አስተያየት ሰጪዎች የስርዓቱ ደጋፊ የሆኑ አርቲስቶች በሃገር ቤት ከወያኔ ጋር በመሞዳሞድ የሚያገኙት ጥቅም ውጭ ሲመጡ ሊያገኙ አይገባም ይላሉ። ዲያስፖራው ሃገሩን የሚያከብረውን አርቲስት እንደሚያክብረው ሁሉ ከወያኔ ጋር ለሆዱ ያደረውን ድምጻዊም በማግለል ተመልካች አልባ ማድረግ እንደሚገባው አስተያየት ሰጪዎች ይናገራሉ።

ከሃመልማል አባተ ውጭ ነዋይ ደበበ፣ ሰለሞን ተካልኝና የመሳሰሉት ድምጻዊያን በዲያስፖራው ኪሳራ እንደደረሰባቸው ይታወሳል።

(ዘ-ሐበሻ) ተበቺሳ የተሰኘውን አልበሙን በቅርቡ የለቀቀው ድምፃዊ ብርሃኑ ተዘራ (ላፎንቴን) በሚኒሶታ ትናንት ማርች 15 ቀን 2014 ዓ.ም የተሳካ የሙዚቃ ኮንሰርት አቀረበ።

በእናት ኢንተርቴይመንት እና በዲጄ ቢኬ አስተናጋጅነት በሚኒሶታ ራስ ላውንጅ በተደረገው የሙዚቃ ኮንሰርት ላይ ብርሃኑን ለማየት በርካታ የሚኒሶታ ነዋሪዎች የተገኙ ሲሆን በሙዚቃውም መደሰታቸውን ከተለቀቁ ቪድዮዎች መረዳት ይቻላል። ብርሃኑ አማርኛ፣ ኦሮሚያ፣ ትግርኛና ሌሎች የኢትዮጵያ ብሔረሰብ ሙዚቃዎችን የተጫወተ ሲሆን በተለይ “አምበሳው አገሳ” የሚለውን ሙዚቃ ሲጫወት የሚኒሶታ ነዋሪ የአንድነት ስሜቱን መቆጣጠር ተስኖት ሲፈነጥዝ ዘ-ሐበሻ የቀረጸችው ቪድዮ ያሳያል።

አርቲስት ብርሃኑ ተዘራን ከኮንሰርቱ በኋላ ዘ-ሐበሻ አነጋግራው በሚኒሶታ የተደረገለት አቀባበል ያማረ እንደነበርና ከፍተኛ ሕዝብ በኮንሰርቱ ላይ በመገኘቱ መደሰቱን ጠቁሟል።

ከብርሃኑ ተዘራ ጋር ያደረግነውን ቃለምልልስ እስከምናቀርብ ከሙዚቃ ኮንሰርቱ ቪድዮ አንዱን እንጋብዛችሁ።

(ዘ-ሐበሻ) “ላጽናናሽ”፣ “በተራ” እና በሌሎችም በተሰኙት ሙዚቃዎቹ የሚታወቀውና 2 ሙሉ አልበም የሰራው ድምፃዊ ጌድዮን ዳንኤል በአዲስ አበባ የጎዳና ተዳዳሪ ለመሆን እንደተዳረገና እርዳታ እንደሚያስፈልገው አዲስ ጉዳይ መጽሔት ዘገበ።

በአዲስ አበባ ታትሞ የሚሰራጨው አዲስ ጉዳይ መጽሔት ጓደኞቹን ጠቅሶ እንደዘገበው ድምፃዊው የአእምሮ ህመም ምልክቶች ከታዩበት ረዥም ጊዜ ሆኖታል። መጽሔቱ ያነጋገረው የድምጻዊው ጓደኛ “ጌድዮን ካልጠጣ ሰላማዊ ሰው ነው ከጠጣ ግን በጣም ኃይለኛና ሰውን የሚያስቸግር ሰው ነው” ሲል ይገልጸዋል። ሌሎች ደግሞ ድምጻዊው ሊያገኝ የሚገባውን የሳይካትሪስት ህክምና አለማግኘቱ ለዚህ እንዳበቃው ይናገራሉ::

ጌድዮዎን በተለይ 2ኛ አልበሙን ካወጣ በኋላ ብዙም ተቀባይነት አለማግኘቱ ለዚህ የአእምሮ ችግር እንዳበቃው የሚገልጹ የቅርብ ወዳጆቹ አሉ። እንደ አዲስ ጉዳይ መጽሄት ከሆነ ይህ ወጣትና ጥሩ ብቃት ያለውን ድምጻዊ ሕይወት ለማስተካከል የሙያ አጋሮቹ፣ ማንኛውም ተቋም፣ እንዲሁም ግለሰቦች ሊተባበሩት ይገባል።

የጌድዮን 3 ሙዚቃዎችን ያድምጡ።

‹‹ሂቦንጎ›› የወቅቱ ተወዳጅ ዘፈን ነው፡፡ ይህንን ዘፈን የተጫወተው ደግሞ ድምጻዊ ስንታየሁ ጥላሁን ነው፡፡ በ1973 ዓ.ም እዚህ አዲስ አበባ የተወለደው ስንታየሁ የቤተሰቡ የመጀመሪያ ልጅ ሲሆን፣ ከእሱ በታች አራት ልጆች አሉ፡፡ እስከ ስምንተኛ ሆሳዕና ውስጥ፣ ከዘጠነኛ እስከ አስራ ሁለተኛ ክፍል ደግሞ እዚህ አዲስ አበባ ውስጥ በጥቁር አንበሳ ት/ቤት ነው የተማረው፡፡
‹‹ሂቦንጎ›› የሚለው ዘፈን በሙያው አፍቃሪ ዘንድ ከፍተኛ ተቀባይነት ማግኘቱ ምክንያት ሆኖን ነው ከድምፃዊ ስንታየሁ ጥላሁን ጋር ቃለ-ምልልስ ያደረግነው፡፡ መልካም ንባብ፡፡
ዘሃበሻ፡- ድምፃዊ ስንታየሁ ጥላሁን ከሁሉ በማስቀደም ይህንን ቃለ ምልልስ ለመስጠት ፈቃደኛ በመሆንህ አመሰግናለሁ፡፡

// ]]>
ስንታየሁ፡- እኔም እድሉን ስለሰጣችሁኝ ከልብ ነው የማመሰግነው፡፡
ዘሃበሻ፡- ስንታየሁ ጥላሁን ራሱን አጭር በሆነ ሁኔታ ያስተዋውቅ ተብሎ ቢፈቀድልህ ምን ብለህ ታስተዋውቃለህ?
ስንታየሁ፡- እኔ የተወለድኩት እዚሁ አዲስ አበባ ከፍላሚንጎ ጀርባ ነው፡፡ ትንሽ ልጅ ሆኜ ወደ ሆሳዕና ሄድኩኝ፡፡ ስለዚህ ያደኩት ሆሳዕና ነው ማለት ነው፡፡ ያደኩት ደግሞ በአያት እጅ ነው፡፡ ሆሳዕና ምንም አይነት የሙዚቃና የቴአትር ክበባት አልነበሩም፡፡ የሙዚቃ ፍቅሩ ግን ውስጤ ነበር፡፡ ሁል ጊዜ ቤት ውስጥ እዘፍናለሁ፡፡ ድምፄን የሚሰሙ ሰዎች መዝፈን እንደምችል ሲነግሩኝና ሲያበረታቱኝ ወደ አዲስ አበባ መጣሁኝ፡፡
ዘሃበሻ፡- መቼ ነበር ወደ አዲስ አበባ የመጣኸው?
ስንታየሁ፡- 1991 ዓ.ም መጨረሻ ላይ ነው የመጣሁት፡፡ በ1982 ዓ.ም መጨረሻ ላይ አዲስ ከተማ ወወክማ በክረምት የሚሰጥ የሙዚቃ ስልጠና ነበር፡፡ ስልጠናውን ከጀመርኩ በኋላ እዛም ጥሩ ነገር እንዳለኝ ተነገረኝ፡፡ በጊዜው ወደ ሁለት መቶ የምንጠጋ ልጆች ነበርን ስልጠናውን እንወስድ የነበረው፡፡ እኔ አንደኛ ነበር የመጣሁት፡፡
ዘሃበሻ፡- ምን ነበር የሚሰጣችሁ ስልጠና?
ስንታየሁ፡- ስለ ድምፅ እንማር ነበር፡፡ ውዝዋዜም ሁሉ ሞክሬያለሁ፡፡ በቡድን በቡድን ተከፋፍለን ውዝዋዜ ሁሉ አቅርበን ነበር፡፡ ከዚያ ወደ ድምፅ ገባሁ፡፡
ዘሃበሻ፡- ከኢትዮጵያ የሙዚቃ አፍቃሪ ጋር ያስታወቀህ ‹‹ሂቦንጎ›› የሚለው ዘፈን ነው፡፡ ‹‹ሂቦንጎ›› ምን ማለት ነው?
ስንታየሁ፡- ሂቦንጎ ማለት ወንዶችና ሴቶች በቡድን ሆነው የሚዘፍኑት ዘፈን ነው፡፡
ዘሃበሻ፡- የሚዘፈንበት የተለየ ወቅት አለው?
ስንታየሁ፡- የተለየ ወቅት የለውም፡፡ ሠርግ ላይ ሊሆን ይችላል፣ አራስ ቤት ሊሆን ይችላል፣ የግርዛት በዓልም ላይ ሊሆን ይችላል ግን ወንዶችና ሴቶች በቡድን፣ በቡድን ሆነው የሚሞጋገሱበት፣ የሚተቻቹበት፣ የሚወራረፉበት፣ ብሎም የከንፈር ወዳጅነት የሚመሰርቱበት ነው፡፡ ግጥም የሚያወርደው ወንድ ከሴቶች መሀል የመረጣትን ያሞግሳታል፡፡ ወይንም ይተቻታል ሴቷም እንዲሁ፡፡ እንዳልኩህ በእዚህ መሀል የከንፈር ወዳጅነትም ይመሰረታል፡፡ ከንፈር ሲሳሳሙ ደግሞ የሴቷ ከንፈር ምልክት እስኪያወጣ ድረስ መሳሳም የሚደረግበት ነው ሂቦንጎ፡፡
ዘሃበሻ፡-‹‹ሂቦንጎ›› የሚለው ዘፈንህ ከኢትዮጵያም አልፎ በውጭ ሀገር እየተደመጠልህ ነው፡፡ ስትሰራው ይህንን ጠብቀህ ነበር?
ስንታየሁ፡- በፍፁም አልጠበኩም፡፡ በእውነት ነው የምልህ የስራው ውጤት እንዲህ ይሆናል የሚል ግምት አልነበረኝም፡፡ ከጠበኩት በላይ ነው የሆነው፡፡ በጣም ብዙ ስልክ ነው አሁን የሚደወልልኝ፡፡ ከኢትዮጵያ የተለያዩ ክልሎ ች ሁሉ ይደወልልኛል፡፡ ከደቡብ አፍሪካ ሁሉ ይደወልልኝ ነበር፡፡ የዓለም ዋንጫ በደቡብ አፍሪካ ይካሄድ በነበረበት ወቅት ለስራ ብዙም አይወጡም ነበር፡፡ ‹‹አንድ ቤት ተሰብ ስበን ስራህን እየሰማን ነው›› ብለው የደወሉልኝ አሉ፡፡
ሃበሻ፡- ይህ ዘፈን አንተ በነፃ መስጠትህን አውቃለሁ፡፡ ተሸጧል የሚልም ነገር ሰምቻለሁ፡፡ ስለሽያጩ የምታውቀው ነገር አለ?
ስንታየሁ፡- እኔ አልሸጥኩም፡፡ በሀገራችን ላሉ የመገናኛ ብዙሃኖች ሰጠሁ፡፡ ከእዚህ ውጭ ሆሳዕና ለማውቃቸው ልጆች አንድ፣ ሁለት ሲዲ ሰጥቼ ነበር፡፡ የሚገርምህ ዘፈኑ በሶስት ቀን ውስጥ ነው የሆሳዕና ከተማን ያዳረሰው፡፡ በቅጂ ነው ከተማው የተዳረሰው፡፡ በስፋት የደረሰው በእዚህ ምክንያት ነው እንጂ እኔ አልሸጥኩም፡፡
ዘሃበሻ፡- ግን ደውሎ ያንተን ስራ እንደገዛ የነገረህ ሰው የለም?
ስንታየሁ፡- ገዛን የሚሉ ሰዎች ከሆሳዕናም ሆነ ከተለያዩ አካባቢዎች ይደውሉልኛል፡፡ ‹‹በሃምሳ ብር፣ በመቶ ብር ዛሬ ሲዲህን ገዛን ብለው ደውለው የነገሩኝ ሰዎች አሉ፡፡››
ዘሃበሻ፡- አንተ በነፃ የሰጠኸውን ሌሎች ሸጠው በገንዘቡ ተጠቃሚ በመሆናቸው ምን ይሰማሃል?
ስንታየሁ፡- በጣም ነው እኔ የምቆጨው፡፡ የለፋነው እኛ ነን፡፡ ስራውን በእዛ መልክ ለሙያው አፍቃሪ ለማድረስ ተጨንቀናል፡፡ እንዲህ ሆነን የሰራነውን ስራ ሌሎች እየሸጡ ሲጠቀሙበት እንዴት አይቆጭም? የሰራው እኮ ምንም አልተጠቀመበትም፡፡ የተጠቀመበት ሌላው ነው፡፡ ይህ መሆኑ በጣም ነው የሚቆጨው፡፡
ዘሃበሻ፡- በዘፈንህ ክሊፕ ላይ የውጭ ሀገር ዜጎች አሉ፡፡ እነሱን ማካተቱ ለምን አስፈለገ?
ስንታየሁ፡- ክሊፑ ላይ እንደተመለከትከው ካርታ አሳያቸዋለሁ፡፡ ሃዲያ ውስጥ ያሉ ሲታዩ የሚገባቸውን የቱሪስት መስህቦችን ማለት ነው፡፡ ያንን ለማሳየት ነው የፈረንጆቹን ለመጠቀም የቻልነው፡፡
ዘሃበሻ፡- እነዚህ የውጭ ሀገር ዜጎች በአጋጣሚ በቀረፃ ወቅት የተገኙ ናቸው ወይንስ ታስቦበት ነው እንዲገቡ የተደረገው?
ስንታየሁ፡- ታስቦበት ነው የሆነው፡፡ ካርታውን ለጎብኚዎች እያሳየን የቱሪዝም መስህቦችን የመጠቀም ሀሳቡ ሲመጣልን በእኛው ልጆች ነበር ለመስራት ያሰብነው፡፡ በኋላ ግን ለምን የውጭ ሀገር ሰዎች አይሆኑም የሚል ሀሳብ መጣና ፈረንጆቹን አስገባን፡፡
ዘሃበሻ፡- የ‹‹ሂቦንጎ›› ዘፈን መወደድ፣ ከጠበከው በላይ በሙያው አፍቃሪ ዘንድ ተቀባይነት ማግኘት ስንታየሁን ለቀጣይ ስራው ምን ያህል አነሳስቶታል?
ስንታየሁ፡- በጣም ነው ለስራ ያነሳሳኝ፡፡ እኔ አዲስ አበባ ተወልጄ ያደኩት ሆሳዕና ነው፡፡ ቋንቋውን እችላለሁ፡፡ የሚገርምህ እንደ ሂቦንጎ ያልወጡ ጥሩ ጥሩ የባህል ዘፈኖች አሉ፡፡ እነዚህን በጥሩ ሁኔታ አቀናብሮ ወደ አድማጭ ለመስራት በጣም ተነሳስቻለሁ፡፡ ቀደም ሲል እንደነገርኩህ ሂቦንጎ የሚለው ዘፈን ይህንን ያህል ተቀባይነት ያገኛል ብዬ አልጠበኩም ነበር፡፡ የሂቦንጎን ውጤት ላይ ግን የበለጠ እንድሰራ አድርጎኛል፡፡ በቅርቡም አዲስ የሚወጣ ስራ አለኝ፡፡ ‹‹ሸምበላላ›› የሚል ነው ርዕሱ፡፡ በሃዲያኛ ‹‹ሸምበላላ›› ማለት ‹‹ብዙ›› እንደማለት ነው፡፡ የሙዚቃ ክሊፕ ላይ እንዳየኸው ከብቶቹ ላይ ማርና ወተት ነው የሚረጨው፡፡ የሃዲያ አርቢዎች ከብቶቻቸው በቁጥር መቶ ሲሞሉ፣ አንድ ሺህ ሲሞሉ ያስቆጥራሉ፡፡
ዘሃበሻ፡- የከብቶቹ ቁጥር ከመቶ በታች ከሆነ አይቆጠርም?
ስንታየሁ፡- አዎ! መቶ ሲደርስ ነው የሚቆጠረው፡፡ ‹‹ጢቤ ወገንማ›› ነው የሚባለው ሂቦንጎ… ወደ ገጽ 16 የዞረ
ስርዓቱ፡፡ ከብቶችህ መቶ ሲሞሉ ታስቆጥራለህ፡፡ ስታስቆጥር ግን የከሱ ከብቶችና በቅርብ የተወለዱ ጥጃዎች በቆጠራው አይካተቱም፡፡ ደህና ደህና ከብቶች ናቸው የሚቆጠሩት፡፡ በዛ ላይ ‹‹ሸምበላላ›› ይባላል፡፡ ከብቶቹ ብዙ ናቸው እንደማለት ነው፡፡ በዚህ ፕሮግራም የሚዘፈን ዘፈን ነው የሰራሁት፡፡ ‹‹ሸምበላላ›› የሚባል ማለት ነው፡፡ ይህ ዘፈን በቅርብ ይወጣል፡፡
ዘሃበሻ፡- እዚህ አዲስ አበባ የምሽት ክበብ፣ መድረኮች ትሰራለህ?
ስንታየሁ፡- አዎ! እሰራለሁ፡፡ ሠርጎችን፣ የመድረክ ዝግጅቶችንም እሰራለሁ፡፡ በሀበሻ ሬስቶራንትም የምሽት ክበብ እየሰራሁ ነው ያለሁት፡፡
ዘሃበሻ፡- በልጅነትህ ሆሳዕና እያለህ እረኝነት ሞክረሃል?
ስንታየሁ፡- እረኝነት ወጥቻለሁ፡፡ እርሻም አርስ ነበር፡፡ እንጨት እሰብር ነበር፡፡ አጥርም አጥር ነበር፡፡ ያደኩት ገጠር አካባቢ ስለሆነ የገጠር ልጆች የሚሰሩትን ሁሉ ሞክሬያለሁ፡፡
ዘሃበሻ፡- በአያት እጅ ሆሳዕና እንዳደክ ነግረኸኛል፡፡ በአያት እጅ ያደገ ደግሞ ሞልቃቀ ነው የሚባል ነገር አለ፡፡ ስንታየሁ ሞልቃቃ ሆኖ ነው ያደገው?
ስንታየሁ፡- እኔ አይደለሁም፡፡ የሚገርምህ አያቴ ያሞላቅቀኛል፡፡ ግን መቅጣት ካለበት ደግሞ ይቀጣኛል፡፡ በጣም ሀይለኛ ነው፡፡ ያሞላቀቅቀኛል ደግመም ይቀጣኝ ነበር፡፡ በጣም ነው ደግሞ የሚወደኝ፡፡ የሚገርምህ ትንሽ ልጅ ሆኜ አንድ ቀን አንድ ነገር አጥፍቼ ይቀጣኝ ነበር፡፡ እሱ ሲገርፈኝ ጎረቤት አካባቢ የነበረች ሴትዮ ‹‹ቅጣው ይሄ ባለጌ›› እያለች ታያለች፡፡ አያቴ እኔን ገርፎኝ ንዴቱ ከበረደለት በኋላ ቀጥታ ሄዶ ከሴትየዋ ጋር ነው መጣላት የጀመረው፡፡
ዘሃበሻ፡- ለምን?
ስንታየሁ፡- እኔ ተናድጄ ነው፡፡ ልጄን ስገድለው ለምን አትገላግይኝም ብሎ ነው የተጣላው፡፡ እንዳልኩህ አያቴ ቢያሞላቅቀኝም በስርዓቱ እንዳድግ ይቀጣኝ ይመክረኝም ነበር፡፡
ዘሃበሻ፡- ለመዝፈንም የሚያበቃኝ ድምፅ ስላለኝ ወደ ሙያው መግባት አለብኝ ብለህ የወሰንክበትን ጊዜ ታስታውሰዋለህ?
ስንታየሁ፡- እንዳልኩህ ሆሳዕና ከተማ ውስጥ ክበባት የለም፡፡ ችሎታህን የምታወጣበት ነገር የለም፡፡ እኔ ግን ቤት ውስጥ እዘፍን ነበር፡፡ እኔ ቤት ውስጥ ከሆንኩኝ ቴፑ በጭራሽ ዝም አይልም፡፡ የሚገርምህ ከማብዛቴ የተነሳ እናቴ የቴፑን ሶኬት ደብቃብኝ ሁሉ ትሄድ ነበር፡፡ በጣም ነበር የምዘፍነው፡፡ ከቤት ውጭም እዘፍን ነበር፡፡ ድምፄን የሰሙ ሰዎች ‹‹ለምን ዘፋኝ አትሆንም?›› ሲሉኝ ለካ መዝፈን እችላለሁ አልኩኝ፡፡ የወንድ የለ፣ የሴት የለ የሁሉንም ዘፋኞች ዘፈን ማጥናትና መዝፈን፣ እንዲሁም ራሴ መሞከር ጀመርኩኝ፡፡ በኋላ እዚህ አክስቴ ስለነበረች በቀጥታ እሷ ጋር ነው የመጣሁት፡፡ ወ.ወ.ወ.ክ ስልጠናውን ወሰድኩ፡፡ የሚገርምህ ‹‹ሪትም›› ምን ማለት እንደሆነ አላውቅም፡፡ ግን ስዘፍን ከሪትም ወጥቼ አላውቅም ስዘፍን ‹‹ሜዠርህ›› ምን ላይ ነው? ተብዬ ስጠየቅ ሙዚቃውን አውቀዋለሁ ነበር የምለው፡፡ ‹‹ሜዠር›› ምን ማለት እንደሆነ አላውቅማ! ግን ሙዚቃውን ሲሰሩልኝ ከቅኝት ላልወጣ ነበር የምዘፍነው፡፡ አሁን ሳስታውሰው ለራሴ ይገርመኛል፡፡
ዘሃበሻ፡- ስለዘፈንክ ተብሎ ለመጀመሪያ ጊዜ ምን ያህል ተከፈለህ?
ስንታየሁ፡- በክበብ ውስጥ እያለን የመድረክ ዝግጅት ስንሰራ አስር ወይንም ሃያ ብር ነበር የሚሰጠን፡፡ ከዚያ በኋላ ሠርግ ሰርቼ ሠላሳ ብር ተከፍሎኛል፡፡
ዘሃበሻ፡- ትልቅ ገንዘብ ነበር?
ስንታየሁ፡- አዎ! እናቴ ገንዘብ ትልክልኝ ነበር፡፡ ግን እናቴ ከምትልክልኝ ገንዘብ ይልቅ ሠርግ ሰርቼ ያገኘኋት ሠላሳ ብር ለእኔ ትልቅ ነበረች፡፡
ዘሃበሻ፡- ስንታየሁ የሙሉ አልበም ስራህስ?
ስንታየሁ፡- ቀደም ሲል እንደነገርኩህ ሁለተኛውን ነጠላ ዜማዬን ጨርሻለሁ፡፡ ከዚህ በኋላ ወደ ሙሉ አልበም ስራዬ ነው የምሄደው፡፡
ዘሃበሻ፡- እስካሁን በኪነ-ጥበብ መንገድ የተጓዝክበት መንገድ አልጋ ባልጋ ነበር?
ስንታየሁ፡- ብዙ ፈታኝ ነገር ነበረበት፡፡ ጉዞው ቀላል አይደለም፡፡ የምሽት ክበብ ስጀምር የጀመርኩት ዲ-አፍሪክ ሆቴል ነበር፡፡ በሳምንት ሁለት ቀን ነበር የምንሰራው፡፡ ድሮ ስጀምርና አሁን ያለኝ ድምፅ ይለያያል፡፡ አሁን የተሻለ ድምፅ ነው ያለኝ፡፡ ድምፄ የተሻለ እንዲሆን መልፋት ያስፈልገኝ ነበር፡፡ አዲስ ከተማ ወወክማ ስንሰራ ለልምምድ የምንገናኘው ስምንት ሰዓት ነበር፡፡ እኔ ግን ሰባት ሰዓት ተገኝቼ የድምፅ ልምምድ እሰራ ነበር፡፡ ለአንድ ድምፃዊ የድምፅ ልምምድ መስራት የግድ አስፈላጊ ነገር ነው፡፡ እንዳልኩህ በብዙ ልፋት ነው አሁን የደረስኩበት ደረጃ የደረስኩት፡፡ የምሽት ክበብ ስትሄድ አንዱ ጋ‹‹ጥሩ ድምፅ አለህ›› ሊሉህ ይችላሉ፡፡ አንዱጋ ደግሞ ‹‹ዘፋኝ ነኝ ብለህ ነው?›› ሊሉ ይችላሉ፡፡ እኔ ግን እንደ እሱ አይነት ነገር አላጋጠመኝም፡፡ ግን ልፋት አለው፡፡ ድካም አለው፡፡
ዘሃበሻ፡- ‹‹ሂቦንጎ›› ሙዚቃውንም ክሊፑንም ለመስራት ያወጣችውን ወጭ መልሰሃል?
ስንታየሁ፡- አልመለስኩም፡፡ የክልሉ መንግስት ግን የተወሰነ ግማሽ ብር ሸፍኖልኛል፡፡ ክሊፑ ላይ የለበስኩት ልብስ ደግሞ ውድ ነበር፡፡ መግዛት አልችልም፡፡ እሱንም የሆሳዕና የካቢኔ አባላት ናቸው አውልቀው የሰጡኝ፡፡ በእዚህ አጋጣሚ እነሱንም አመሰግናቸዋለሁ፡፡
ዘሃበሻ፡- እኔ ግን በ‹‹ሂቦንጎ›› ዘፈን መሬት ተሰጥቶታል የሚባል ነገር ሰምቻለሁ?
ስንታየሁ፡- አንተ መሬት ብቻ ነው የሰማኸው?
ዘሃበሻ፡- አዎ! ሌላም አለ?
ስንታየሁ፡- የሚባለው ነገርማ ብዙ ነው፡፡
ዘሃበሻ፡- ምን ምን ይባላል?
ስንታየሁ፡- እንዳልከው መሬት አግኝቷል ይባላል፡፡ ብዙ ብር በሽልማት አግኝቷል ይባላል፡፡ ኧረ ብዙ ነገር ነው የሚባለው፡፡ የሚባለውን ሁሉ ግን እኔ አላገኘሁም፡፡ ከሁሉ በላይ ደስ የሚለኝ ያደኩበትን አካባቢ ባህላዊ ዘፈን በእዚህ መልክ ለሙያው አፈቃሪ ማስተዋወቅ በመቻሌ ነው፡፡ መጀመሪያ የመሬት ሽልማቱን አስቤ አልሰራሁም፡፡ ቀደም ሲል እንዳልኩህም ዘፈኑ እንዲህ ይወደዳል ብዬም አልገመትኩም፡፡ በእርግጥ የሀዲያ ባህሉ፣ ታሪክ ብዙም አልወጣም፡፡ ግን ብዙ ሊያሰሩ የሚችሉ፣ ሊወጡ የሚገባቸው ነገሮች አሉ፡፡ ካልተሰራው ብዙ ነገር እጅግ በጣም ጥቂቱን ለማውጣት ብዬ እንጂ የመሬት ሽልማትን አስቤ አልሰራሁም፡፡
ዘሃበሻ፡- መስከረም 13 እና 14 ሀዲያ ላይ የሚዘጋጅ አንድ ሲምፖዚየም አለ፡፡ እዚህ ላይ ትገኛለህ ብዬ አስባለሁ፡፡
ስንታየሁ፡- በእርግጥ እገኛለሁ፡፡ አዲሱ ነጠላ ዜማዬንም የሰራሁት ለእዛ ነው፡፡ ሰው ለበለጠ ስራ እንዲነሳሳ የሚያደርግም ስራ ነው፡፡ በሲምፖዚየም ላይ በትክክል እገኛለሁ፡፡
ዘሃበሻ፡- ክብደትህ ምን ያህል ነው?
ስንታየሁ፡- መጀመሪያ አንተ ገምት…
ዘሃበሻ፡- ከሰማኒያ እስከ ሰማኒያ አምስት ኪሎ ትሆናለህ ብዬ እገምታለሁ፡፡
ስንታየሁ፡- ክብደቴ አንድ መቶ ሶስት ኪሎ ግራም ነው፡፡
ዘሃበሻ፡- ከባድ አይደል?
ስንታየሁ፡- ቁመቴ ረጅም ነው፡፡ አንተ ገምት ስልህ እስከ ሰማኒያ አምስት ኪሎ ብለህ ነው የገመትከው፡፡ በእርግጥ በወተት ስላደኩ ከልጅነት የመጣ ክብደት ነው፡፡ እንደምታየው ቦርጭ የለኝም፡፡ ስፖርት እሰራለሁ፡፡ ስፖርት መስራት እወዳለሁ፡፡ ከሙያው ውጭ የእረፍት ጊዜዬን የማሳልፈው በማንበብና ስፖርት በመስራት ነው፡፡ ከቁጥር አንድ ጀምሮ የእናንተ መጽሔት አለኝ፡፡ ከፋይል የጠፋብህ ካለ ላውስህ እችላለሁ፡፡ ሌሎችም እንዲሁ አሉ፡፡ ከማንበብ በተጨማሪ የዋና ስፖርት እወዳለሁ፡፡ ጂም እሰራለሁ፡፡
ዘሃበሻ፡- ውፍረት ለጤና ጥሩ አይደለም የሚሉ ሰዎች አሉ፡፡ ውፍረት የሟቾች ምልክት ነው የሚሉ ሰዎችም አሉ፡፡ በአንተ እምነት የየትኛው ሀሳብ ነው ልክ?
ስንታየሁ፡- እኔ ውፍረት የምቾት ምልክት ነው አልልም፡፡ ለጤናም ለእንቅስቃሴም ቀልጠፍ ሲባል ነው ደስ የሚለው፡፡ እኔ ስፖርት ስለምሰራ እንደ ክብደቴ አይደለሁም፡፡ ቀልጠፍ ብዬ ነው የምሰራው፡፡
ዘሃበሻ፡- በነገራችን ላይ ‹‹ሂቦንጎ›› የሚለው ዘፈንህ ሀዲያ ውስጥ በመድረክ ለተመልካች አቅርበህ ታውቃለህ? ወይንስ በክሊፑ ብቻ ነው የሚያውቅህ?
ስንታየሁ፡- ዝግጅት ተዘጋጅቶ አንድ ሁለት መድረክ ሰርቻለሁ፡፡ ብዙ ህዝብ የሚሰበስብበት ዝግጅት ነበር፡፡ በእዚህ ዝግጅት ላይ ነው ሆሳዕና ውስጥ የሰራሁት፡፡
ዘሃበሻ፡- እኔ ጥያቄዬን እየጨረስኩ ነው መታለፍ የለበትም የምትለው ነገር አለ?
ስንታየሁ፡- የሚፈቀድልኝ ከሆነ ማመስገን የምፈልጋቸው ሰዎች አሉ፡፡
ዘሃበሻ፡- እድሉን ሰጥቼሃለሁ ቀጥል…
ስንታየሁ፡- አሁን በህይወት የሌለችው ያሳደገችኝ እናቴን ኑራሜ ሎሚሳኮን፣ እንዲሁም እናቴን ቦጋለች ጥላሁንን፣ ወይንሸት ገለታን በጣም ነው የማመሰግናቸው፡፡ ሶስቱም የምወዳቸውና የሚወዱኝ ናቸው፡፡ እንደወለዱኝ ነው የምቆጥረው፡፡ እነሱን በጣም አመሰግናለሁ፡፡ ሁሉንም አድምጠው በስልክና በአካል አስተያየት የሰጠኝንና መላውን የኢትዮጵያ ህዝብንም በጣም አመሰግናለሁ፡፡
ዘሃበሻ፡- እኔም ለነበረን ቆይታ አመሰግናለሁ፡፡ እግዚአብሔር ይስጥልኝ፡፡